E informacion den comunicado di prensa di Banco Central no tabata corecto. Esaki director di Refineria di Aruba, Alvin Koolman ta comenta riba e discusion cu a lanta siman pasa, si tin un retraso of no den e proceso di reapertura di e refineria.
Bon Dia Aruba den su edicion di diasabra a analisa e relato di Banco Central pero tambe duna otro informacion riba e parti di financiamento. A base di esey nos a conclui den nos editorial cu mester tin un retraso en berdad.
Sinembargo sr. Koolman ta pone hopi cla awor cu ‘na ningun momento Citgo Aruba a informa Gobierno cu e proyecto no ta sigui of cu e ta atrasa’. “Por conclui cu Banco Central di Aruba no a compronde e asunto bon y a suministra informacion robes, pa cual e agencia internacional di noticia (Argus) a mal interpreta e comunicado di prensa”, asina ta para den e relato cu e compania estatal a manda ayera nochi.
Bon Dia Aruba lo purba haya e banda di Banco Central Aruba riba e conclusion di Refineria di Aruba cu e instituto financiero a duna informacion robes. Tambe nos lo haci un intento pa haya contacto cu Argus pa wak cu ken nan a papia na Venezuela.
Den e articulo di Argus nan ta cita un vocero di Ministerio di Energia di Venezuela unda ta bisa cu e proyecto no por sigui pa falta di financiamento. Director Koolman ta bisa cu e ‘ta lamenta cu e medio ta referi na un vocero pero no ta menciona nomber y como tal ta dificil pa deduci ken por a bisa algo asina’. Den e relato Refineria di Aruba tambe ta comenta cu nan ‘a garantisa cu Citgo Aruba ta siguiendo manera acorda’.
Fiansa adelanta
Locual ta sosodiendo awor ta cu, e institutonan financiero ta rekeri un evaluacion completo, hopi detaya, di kico ta e inversionnan cu mester haci awor pa rehabilita e refineria pa por cuminsa opera, segun e relato. “Ta papia di entre 600 pa 700 miyon dollar, cu aunke e business case ta bon, toch e industria financiero ta rekeri un evaluacion mas sigur. Na februari ultimo CITGO Aruba a cuminsa tuma e prome 100 trahadonan, pa prepara e evaluacion aki. Ta premira cu fin di e luna aki lo ta cla cu e investigacion tecnico aki.”
E director tambe ta informa: ‘cu adelantando pa e financiamento final, banconan a otorga CITGO Aruba un asina yama bridge loan di 200 miyon dollar pa nan por cuminsa opera y prepara e evaluacion detaya aki, pa despues nan duna e resto di e fiansa’.
