Banco Central di Aruba, BCA, ta aplaudi tur iniciativa cu ta facilita seguridad y eficiencia di pago, pero no a ricibi splicacion specifico pakico ya no tin uso di e sistema di Maestro cu ta nifica cu entrante e luna aki comercio a haya su mes confronta cu gasto adicional pa e servicio di ‘swipe machine.’
Esey ta contesta cu Bon Dia Aruba a ricibi di Banco Central riba e tema. “Banco Central a tuma nota di e publicacion di Aruba Bankers’ Association, ABA, relata na aumento di e gasto (fees) pa uso di Mastercard.
Manera ta conoci, banconan comercial a cuminza cobra gasto pa e sistema di debit, pa motibo cu mester haci uso di e plataforma di credito cu companianan Visa y/of Mastercard ta brinda. Un di e motibonan segun ABA ta cu e sistema di Maestro cu tabata existi pa mas di 30 aña ya no tabata brinda siguridad contra hortamento.
Segun Mastercard mes, cu tabata maneha Maestro, e sistema tabata producto di su tempo, basa riba comercio tradicional, unda compranan ta den persona. Rond mundo, y Europa sigur, no por a usa Maestro pa compranan ‘online.’ Consecuentemente Mastercard a conclui cu no por brinda un producto optimal pa e comercio nobo, cu ta digital y como cu e plataforma pa credit card ta mas grandi, a dicidi pa mara e debit card na e network di credit card. Y aunke Maestro tabata di Mastercard, awor VISA tambe ta ofrece e servicio di debit card, bou condicionnan similar. Na Aruba, algun banco a scoge VISA como su debit card y otro a scoge pa e plataforma di Mastercard.
Esaki tin su consecuencia pa Aruba y comercio local, cu contrario na paisnan grandi, no ta depende di comercio digital. Mayoria negoshi na Aruba ta ‘den persona.’
Banco Central den su contestanan riba pregunta cu a manda por escrito a conseha pa acerca ABA pa detayenan riba e motibo y impacto pa usa e plataforma di Visa/Mastercard, ya cu esakinan ta pa cuenta di e banconan local, incluso di impacto financiero pa consumidor na Aruba. Tampoco Banco Central por duna opinion riba cua por ta e impacto riba e capacidad financiero di negoshinan pa absorba e gastonan di uso di e plataformanan di credit card pa e servicio di debit. “Banco Central no ta dispone di datonan di negoshinan, pa asina duna un opinion riba e posibilidad pa nan absorba e gastonan,” tabata e reaccion.
Manera a sali dilanti den reportehan anterior, e cobranza di e gastonan, ta haci cu algun negoshi, particularmente negoshi chikito ta nenga di haci uso di e sistema di debitcard. Sea ta pidi pa paga cu cash of ta pidi pa haci transferencia di pago, esta di cuenta pa cuenta a base di appnan. Comerciantenan cu a combersa cu Bon Dia Aruba a base anonimo a mustra cu e asina yama ‘swipe machine,’ ta bira mucho caro pa nan, y ta prefera traha cu cash. Pero, tambe esnan cu ta acepta cash, lo adapta nan prijs pa inclui e gasto di e debitcard, pasobra no por diferencia den prijs si ta paga cu carchi of cash. Es mas, a tuma nota di algun negoshi cu a cuminza cobra un porcentahe adicional ora un cliente paga cu carchi, sea ta debit of credit, algo cu no ta permiti.
Cash y risico
E realidad nobo aki, esta cu ta bolbe na uso di cash tin Banco Central di Aruba un poco preocupa. “Uso di cash ta trece otro riesgo pa e consumidor y e comerciante, a base di seguridad. Semper nos sugerencia ta pa consumidornan y comerciantenan ta conoci cu e diferente opcionnan di pago. Y pa asina por haci un decision pa nan mes di cua metodo ta desea pa usa of acepta na momento cu mester haci of ricibi pago. Banda di cashi y transaccionnan cu carchi, tambe ta posibel pa haci pago via di e sistema di Banco Central di Aruba, cu ta ‘I-Pago.’” Banco Central a bisa Bon Dia Aruba cu introduccion di I-Pago a haci posibel pa transferencianan interbancario den forma instantaneo. “Tambe tin e posibilidad awor pa paga via ‘Sentoo’ si e negoshi ta conecta riba e sistema aki,” tabata e comentario di BCA. BCA no ta dispone di datos pa duna un opinion riba e posibel reduccion di gasto financiero pa consumidor. “BCA ta aplaudi tur iniciativa cu por trece mas opcion pa consumidornan por scoge den diferente methodo pa haci nan pagonan.
Conceptonan di ley
Actualmente no tin un ley pa regula tarifanan cu e banconan local ta cobra pa uzo di servicionan di pago. E tarifanan ta stipula pa e propio banconan. “Den cuadro di su ambicion pa modernisa e sistema di pago na Aruba y mehora e experencia di pago pa e consumidor y negoshi, BCA a tuma e iniciativa pa prepara dos concepto di ley pa asina por regula e sistemanan di pago na Aruba. Ta trata di e conceptonan di ley: Landsverordeningtoezicht betaaldienstverleners y Landsverordening toezicht aanbieders van betalingssystemen. Actualmente e dos conceptonan di ley aki ta den e proceso legislativo. E meta di e dos conceptonan di ley aki ta pa establece sistemanan di pago na Aruba cu ta sigur, eficiente, confiabel y cu tarifanan rasonabel.”
Mientrastanto, Banco Central di Aruba a bisa di ta explorando solucionnan di pago innovativo pa por ehecuta pagonan local via otro sistemanan cu no ta via debit card, pa amplia e alternativanan di pago y asina contribui na un sistema di pago mas moderno pa Aruba.
