Den su rapport riba desaroyonan financiero durante prome kwartaal di 2021, publica durante weekend, Banco Central di Aruba a informa cu e suministro di placa a expande. Ademas, prestamo di hipoteca pa vivienda di institucionnan financiero a contrae cu Afl. 3.1 miyon na Afl. 2,022.8 miyon na fin di maart 2021, compara cu fin di december 2020.

Placa y credito
 Den prome kwartaal di 2021, e suministro di placa a expande cu Afl. 60.1 miyon na Afl. 4,875.5 miyon, compara cu e di cuatro kwartaal di 2020. E aumento a resulta di aumento den tanto den activo externo neto (+Aft. 41.0 miyon) y den activo domestico neto (+Afl. 19.1 miyon).

E expansion den e componente domestico den e suministro di placa tabata resultado di un aumento den credito domestico di Afl. 43.9 miyon y un reduccion den articulonan den balance sheet no relaciona cu credito di Afl. 24.8 miyon. E reduccion den e balance sheet no relaciona cu credito a tabata debi na aumento den ‘otro pasivo’, provision pa perdida crediticio’ y ‘capital social di e accionistanan’, y disminucionnan den ‘local y ekipo’ y ‘cuenta pa cobra y pago anticipa’.

E aumento den credito domestico tabata pa motibo di un aumento den e activo neto di sector bancario den sector publico (+Afl. 68.4 miyon) y un reduccion den activo di sector bancario den sector priva (-Afl. 24.5 miyon). E activonan neto mas halto di sector bancario den sector publico a resulta di depositonan menor di gobierno (-Afl. 88.3 miyon) y activonan bruto (-Afl. 19.9 miyon).

E reduccion di activo den sector bancario den sector priva tabata causa pa reduccion den credito di consumidor (-Afl. 19.8 miyon), prestamo na empresa (-Afl. 3.9 miyon) y hipoteca pa vivienda (-Afl. 1.0 miyon).

E margen di tasa di interes di e banconan comercial (calcula como e diferencia entre e tasa averahe di interes ponderado paga riba prestamo nobo, y e tasa averahe di interes ponderado ofreci riba depositonan nobo) a reduci cu 0.7 punto porcentual na 4.2 porciento den prome kwartaal di 2021, ora di compara cu di cuatro kwartaal di 2020. Esaki a resulta di un reduccion di 0.4 punto porcentual na 6.3 porciento den e tasa averahe di interes ponderado cobra riba prestamo nobo y un aumento di 0.4 punto porcentual na 2.1 porciento di e tasa di interesa ofreci riba depositonan nobo.

Institucionnan financiero no-monetario
 E balance sheet agrega total di e institucionnan financiero no-monetario a aumenta cu Afl. 89.8 miyon, of 1.9 porciento, na Afl. 4,863.8 miyon, compara cu e di cuatro kwartaal di 2020.

Riba e banda di liability, a registra 198.9 miyon florin pa otro rubro (neto) compara cu e Afl. 169.2 miyon den e kwartaal anterior. Ora compara esaki cu e di cuatro kwartaal di 2020, e fondo di reserva di seguro, provisionnan pa fondo di pension y e ‘prestamo y deposito’ a crece cu Afl. 36.2 miyon, Aftl. 29.7 miyon, y Afl. 7.8 miyon respectivamente.

Mercado di hipoteca
 Prestamo di hipoteca pa vivienda di institucionnan financiero a contrae cu Afl. 3.1 miyon na Afl. 2,022.8 miyon na fin di maart 2021, compara cu fin di december 2020. E reduccion aki a resulta di e caida den prestamo di hipoteca pa vivienda di banconan di hipoteca (-Afl. 2.5 miyon), banconan comercial (-Afl. 1.4 miyon), y fondonan di pension (-Afl. 2.5 miyon). Den contraste, prestamo di hipoteca di vivienda di otro institucionnan financiero (+Afl. 0.9 miyon) y companianan di seguro di bida (+Afl. 0.8 miyon) a aumenta.

Pa fin di maart 2021, tabatin aumento den share di mercado di banconan comercial (+0.7 punto porcentual) y banconan di hipoteca (+0.1 punto porcentual) ora di compara cu e prome kwartaal di 2020. Den contraste, e share di mercado a reduci pa fondonan di pension (-0.6 punto porcentual) y companianan di seguro di bida (-0.2 punto porcentual). E share di mercado pa otro institucion financiero a keda igual.