Segun e resumen di e Relato Mensual di augustus 2021 di Banco Central di Aruba, e cantidad di placa den circulacion a baha den luna di augustus ultimo.
Desaroyo monetario
Compara cu juli 2021, e cantidad di placa den circulacion a baha cu Afl. 22,0 miyon te na Afl. 5.136,9 miyon den e luna di augustus 2021. Esaki a resulta for di un reduccion den e activo domestico netto (-Afl. 40,6 miyon) y un subida den e reserva di divisa netto (+Afl. 18,5 miyon).
E caida den e activo domestico netto a wordo causa pa bahadanan den tanto credito domestico (-Afl. 29,5 miyon) y transaccionnan no relata na credito (-Afl. 11,1 miyon).
E reduccion den credito domestico a resulta for di un caida den credito bancario na e sector priva (-Afl. 36,6 miyon) y un aumento den credito bancario netto na e sector publico (+Afl. 7,1 miyon). E bahada den credito bancario na e sector priva a wordo causa pa menos credito na empresa (-Afl. 29,8 miyon) y na consumidor (-Afl. 7,2 miyon).
Di otro banda, hipoteca di vivienda a subi cu Afl. 0,4 miyon. E subida den credito bancario netto na e sector publico ta wordo atribui na un bahada den deposito di gobierno (-Afl. 6,7 miyon). E expansion den e reserva di divisa netto a wordo causa pa compra netto di divisa di Afl 262,0 miyon di publico, principalmente relaciona cu entrada for di turismo. Esaki a wordo pa un gran parti mitiga pa benta netto di divisa di Afl. 243,5 miyon na publico, primordialmente relaciona cu pago pa importacion y otro servicionan.
Inflacion
E nivel general di prijs, cu ta wordo midi door di e indice di prijs di consumo, a registra un subida di 1,4 porciento den e luna di augustus 2021 compara cu augustus 2020. E contribuyente principal na e aumento aki tabata e categoría “transporte”. Pa loke ta trata e promedio anual di e tasa di inflacion, esaki a registra -1,1 porciento na augustus 2021, compara cu -1,4 porciento na juli 2021.
Entrada di Gobierno Entrada total di gobierno a suma Afl. 79,7 miyon na augustus 2021, cual ta Afl. 14,2 miyon mas cu e mesun luna di e aña anterior. Esaki a resulta for di un subida den entrada di impuesto (+Afl. 20,6 miyon) y un bahada den entrada no relata na impuesto (-Afl. 6,4 miyon). E aumento den entrada di impuesto a wordo causa principalmente pa mas entrada for di impuesto riba e asina yama “turnover tax” (B.B.O.)(B.A.V.P.) (+Afl. 6,0 miyon), impuesto riba importacion (+Afl. 4,9 miyon), accijns riba tabaco (+Afl. 2,7 miyon), y impuesto riba salario (+Afl. 2,4 miyon).
Turismo
Na augustus 2021, e cantidad di turista a registra 80.230 turista, cual ta 15.870 menos bishitante (-16,5 porciento) compara cu na augustus 2019. E mercadonan Latino Americano, Norte Americano, y Europeo a baha cu 6.018 bishitante (-63,8 porciento), 5.155 bishitante (-7,0 porciento), y 4.434 bishitante (-41,9 porciento), respectivamente.
