Banco Central di Aruba a publica su relato mensual di juli 2016 unda por mira cu e cantidad di placa den circulacion a subi, credito domestico tambe a aumenta y inflacion a baha. E cantidad di turista a baha cu 9% y esun di crucero cu casi 20%. E cifranan ya ta conoci caba.
Locual tabata falta ta e cifranan di parti di gobierno. Sinembargo Banco Central no por duna un bista riba esaki pa motibo cu dos luna despues, te ainda no a ricibi e informacion di Departamento di Impuesto di e luna di juli. E motibo aki no ta conoci.
Den e luna di juli 2016, e cantidad di placa den circulacion a subi cu Afl. 86,2 miyon te na Afl. 4.157,5 miyon, compara cu e luna anterior. Esaki a resulta for di un crecemento den tanto e activo domestico netto como e reserva di divisa netto di Afl.79,5 miyon y Afl. 6,7 miyon, respectivamente.
E subida den e activo domestico netto a surgi pa motibo di un crecemento den tanto credito domestico como transaccionnan no relata na credito di Afl. 48,2 miyon y Afl. 31,4 miyon, respectivamente. E ultimo menciona a resulta pa motibo di bahada den e asina yama“shareholders’ equity”,un subida den otro debenan, y tambe transaccionnan di clearing.
Credito domestico a crece pa motibo di un expansion den credito bancario netto na e sector publico y credito na e sector priva di, Afl. 39,5miyon y Afl. 8,6 miyon,respectivamente. E subida den credito bancario netto na e sector publico ta debi principalmente na un bahada den deposicion di gobierno y den Fondo pa Desaroyo di, respectivamente,Afl. 37,0 miyon y Afl. 2,0 miyon. E crecemento den credito bancario na e sector priva ta debi primordialmente for di mas hipoteca pa vivienda (+Afl. 7,9miyon) y credito na consumidor (+Afl. 5,1miyon), cual a wordo parcialmente mitiga pa un caida den credito na empresa (-Afl. 4,7miyon).
E expansion den e reserva di divisa netto di e sector bancario ta debi na compra netto di divisa di Afl. 167,0 miyon for di publico, principalmente asocia cu entrada for di turismo, transferencia netto for di cuentanan den exterior di companianan local,transportacion, y inversion directo. E compranan netto di divisa a wordo parcialmente mitiga pa benta netto di divisa di Afl. 160,3 miyon na publico, primordialmente relaciona cu pago pa importacion di mercancia, otro servicionan, otro inversion, e asina yama“portfolio investment” y “financial derivatives”,transferencia coriente, y e asina yama “income account”.
Inflacion
E nivel general di prijs, cu ta wordo midi pa medio di e indice di prijs di consumo,a registra un bahada di 1,1 porciento den e luna di juli 2016,compara cu juli 2015. E contribuyentenan principal na e caida aki ta e componente“Vivienda”, cual ta debi primordialmente na un reduccion den prijs di electricidad y e componente “Transporte”,cual ta debi principalmente na un reduccion den prijs di gasolin. Di otro banda, e componentenan “Recreacion y Cultura”, “Paña y Sapato”, y “Restaurant y Hotel”a registra un aumento. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,7porciento compara cu juli 2015. Pa loke ta trata e promedio anual di e tasa di inflacion, esaki a registra caida di 0,8 porciento na juli 2016 compara cu un bahada di 0,6 porciento na juni 2016.
Turismo
Na juli 2016, e cantidad di turista a registra 99.418 bishitante, cual ta 9,0 porciento (-9.833 bishitante) menos cu na juli 2015. E caida aki a resulta principalmente door di un bahada den e mercado Latino Americano di 33,3 porciento (-11.425 bishitante). Di otro banda, e mercadonan Europeo y Norte Americano a registra subidanandi7,7 porciento (+606 bishitante) y 1,7 porciento (+1.064 bishitante), respectivamente. E caida den e mercado Latino Americano tabata primordialmente causa pa un bahada di 45.7 porciento den bishitante for di Venezuela (-11.769 bishitante). E aumento den e mercado Norte Americano a resulta pa gran parti for di un subida di 1.020 bishitante (+1,7 porciento) for di Merca.
E cantidad di turista crucero a baha cu 19,9 porciento (-4.706 bishitante) te na 18.921 na juli 2016, compara cu juli 2015. E cantidad di barconan a disminui for di 10 na juli 2015 pa 8 na juli 2016.
Entrada di Gobierno
Na juli 2016, informacion disponibel di Departamento di Aduana ta indica cu accijns riba cerbes y impuesto riba importacion a baha cu Afl. 0,9 miyon y Afl. 0,7 miyon, respectivamente. Tambe impuesto riba divisa a cay cu Afl. 1,1 miyon. Di otro banda, accijns riba gasolin a subi cu Afl. 0.3 miyon. Tuma nota cu e cifranan di entrada di gobierno for di Departamento di Impuesto pa luna di juli 2016 no tabata disponibel na momento di publicacion di e relato aki.
