A tuma nota di e noticia den medionan local di comunicacion relaciona cu Ennia Aruba cu ta cay bou su supervision. Ennia Aruba, cu ta forma parti di e grupo Ennia, ta un entidad Arubano cu tin su propio capital y su propio inversion.
BCA a base di ley no ta permiti pa duna informacion cu e ta haya a base di su tarea di supervision, sigur no informacion riba institucionnan individual. Pero BCA ta haya importante pa informa e publico cu e ta vigila den un forma estricto cumplimento continuo di e institucionnan bou di su supervision.
BCA tin na su disposicion diferente instrumento legal cu e por aplica na momento cu e ta constata cu un institucion bou di su supervision no ta cumpli. BCA ta enfatisa cu e ta aplica y lo aplica instrumentonan legal y tur otro autorisacion legal na su disposicion,si tin un situacion cu ta exigi esey semper cu e meta principal pa proteha interesnan di depositonan y aseguradonan. Pa motibo di e instrumentonan aki, no tin motibo pa intrankilidad.
