Den e luna di Mei2016, e cantidad di placa den circulacion a baha cu 27,5 florin miyon te na 3.945,2 florin miyon, compara cu e luna anterior. Esaki a resulta for di un caida den activo domestico netto di 219,6 florin miyon, cual a wordo pa un gran parti mitiga pa un crecemento den reserva di divisa netto di 192,1 florin miyon. E contraccion den e activo domestico netto ta debi principalmente na un bahada di 219,2 florin miyon den credito domestico.
Credito domestico a disminui pa motibo di un bahada di 220,6 florin miyon den credito bancario netto na e sector public0, mientras cu credito bancario na e sector priva a crece cu 1,4 florin miyon. E reduccion den credito bancario netto na e sector publico ta debi principalmente na un crecemento di 218,2 florin miyon den posicion di gobierno, relaciona pa un gran parti cu entrada di 178,2 florin miyon asocia cu e emision di bononan di gobierno na May 2016.Esubida den credito bancario na e sector priva a resulta for di mas hipoteca pa vivienda di 4,1 florin miyon, cual a wordo parcialmente mitiga pa bahadanan den credito na empresa ( -1,6 florin miyon) y credito na consumidor (-1,1 florin miyon).
E expansion den reserva di divisa netto di e sector bancario ta debi na compra netto di divisa di 351,2 florin miyon for di publico, principalmente asocia cu entrada for di e asina yama “portfolio investment”, turismo y transferencia netto for di cuentanan den exterior di companianan local. E subida den e asina yama “portfolio investment” ta relaciona pa un gran parti cu entrada asocia cu e emision di bononan di gobierno menciona anteriormente. E compra nan netto di divisa a wordo parcialmente mitiga pa benta netto di divisa di 159,1 florin miyon na publico, primordialmente relaciona cu pago pa importacion di mercancia y otro servicionan.
Inflacion
E nivel general di prijs, cu ta wordo midi pa e indice di prijs di consumo,a registra un bahada di 1,6 porciento den e luna di mei 2016,compara cu Mei 2015. E contribuyentenan principal na e caida aki ta e componente “Vivienda”, cual ta debi primordialmente na un reduccion den prijs di electricidad y e componente “Transporte”,cu ta debi na un bahada den prijs di gasolin. E componente “Paña y Sapato”, “Operacion di Vivienda” y “Recreacion y Cultura” tambe a contribui na e bahada. Di otro banda, e componente “Restaurant y Hotel” a registra un aumento. Si exclui e componentenan di cuminda y energia for di e indice di prijs di consumo, inflacion ta mustra un cambio di cero porciento compara cu Mei 2015.Pa loke ta trata e promedio anual di e tasa di inflacion, esaki a registra un bahada di 0,5 porciento na Mei 2016 compara cu 0,2 porciento na April 2016.
Turismo
Na Mei 2016, e cantidad di turista a registra 80.964 bishitante, cual ta 7,7 porciento (-6.727 bishitante) menos cu na Mei2015. E bahada den e mercado Latino Americano di 31,4 porciento (-7.981 bishitante)tabata principalmente responsabel pa e contraccion aki. Di otro banda, e mercado Europeo y e mercado Norte Americano a registra subidanan di, respectivamente, 19,4 porciento (+1.181 bishitante) y 0,3 porciento (+155 bishitante). E caida den e mercado Latino Americano tabata primordialmente causa pa un bahada di 43,8 porciento den bishitante for di Venezuela (-8.397 bishitante). E aumento den e mercado Europeo ta pa un gran parti debi na un crecemento di 1.717 bishitante for di Gran Britania, mientras cu bishitante for di Hulanda a cay cu 13.3 porciento (-422 bishitante). E aumento leve den e mercado Norte Americano a resulta for di un subida di 212 bishitante (9,5 porciento) for di Canada, cual a wordo parcialmente mitiga pa un bahada di57 bishitante (0,1 porciento) for di Merca. E cantidad di turista crucero a cay cu 22,6 porciento (-5.985 bishitante) te na 20.462 na Mei 2016, compara cu Mei2015. E cantidad di barconan a disminui for di13 na Mei 2015 pa 8na Mei2016.
Gobierno
Tuma nota cu e cifranan di entrada di gobierno no tabata disponibel na momento di publicacion di e relato aki.
