Banco Central di Aruba a publica siman pasa diferente cifra cu ta duna un vista di e situacion di deficit financiero y debe di gobierno te cu segundo trimester di 2020. Un resumen.

Gobierno su deficit a aumenta considerablemente den di dos trimester di 2020. E surplus financiero di Afl. 54.1 miyon den e mesun periodo di 2019 a bira un deficit di Afl. 301.1 miyon na fin di juni 2020. Gobierno a registra Afl. 4,665.8 miyon na debe pa fin di juni 2020, loke ta Afl. 327.4 miyon mas cu na fin di juni 2019.

Operacion financiero

Gobierno su entrada total a cay considerablemente cu Afl. 207.6 miyon te Afl. 202.4 million den e segundo trimester di 2020, compara cu e mesun periodo di 2019. E caida aki ta resultado di reduccion den tanto entrada di impuesto como entrada di otro fuente, di Afl. 163.8 miyon y Afl. 43.8 miyon, respectivamente. E caida den entrada di impuesto ta mas tanto debi na caida den impuesto riba ganashi (-Afl. 50.6 miyon), BBO (-Afl. 26.9 miyon), impuesto riba importacion (-Afl. 22.5 miyon), impuesto riba salario (-Afl. 12.4 miyon) y grondbelasting (-Afl. 11.6 miyon). Gasto total di gobierno a subi cu Afl. 148.4 miyon te Afl. 504.1 miyon den segundo trimester di 2020, compara cu e mesun periodo di 2019. E aumento ta consecuencia di e gastonan aumenta pa transferencia y subsidio (+Afl. 137.3 miyon), transferencia pa AZV (+Afl. 26.2 miyon) gasto di bienes & servicio (+Afl. 10.9 miyon), y salario mas abao (-Afl. 17.9 miyon) y subsidio di salario (-Afl. 5.0 miyon).

Gastonan di gobierno relaciona cu salario a cay cu Afl. 26.5 miyon te Afl. 148.7 miyon den e trimester revisa, compara cu e mesun periodo di 2019. Esaki tabata resultado di reduccion di salario (-Afl. 17.9 miyon), subsidio di salario (-Afl. 4.9 miyon), y contribucion di dunador di trabao (-Afl. 3.7 miyon). Den e trimester bao revision e gastonan relaciona cu salario compara cu entrada total di impuesto a nota un incremento significativo di 30.9 punto di porciento te 81.5 porciento despues di e caida den entrada di impuesto, di 50.6 porciento den e segundo trimester di e aña anterior.

Debe publico

Debe total di gobierno a aumenta sustancialmente cu Afl. 327.4 miyon o 7.5 porciento te Afl. 4,665.8 miyon te fin di juni 2020, compara cu fin di juni 2019. E aumento aki a resulta di un aumento di Afl. 276.7 miyon di debe di exterior, como tambe un aumento di Afl. 50.6 miyon den debe local. E aumento di debe local a bin di un aumento den tanto debe negociable como debe no negociable di Afl. 41.5 miyon y Afl. 9.1 miyon, respectivamente. E expansion di debe negociable ta atribui na un aumento di bono di tesoro (+Afl. 125.0 miyon) y certificado di prestamo den efectivo (+Afl. 8.0 miyon), cu a keda compensa pa gran parti pa e reduccion den bono di gobierno (-Afl. 91.5 miyon). E aumento den debe no negociable a bin di e crecemento di debe a corto plazo (+Afl. 9.2 miyon). Debe no negociable a largo plazo a keda practicamente sin cambio. Debe no negociable a corto plazo a expande debi na debe no negociable mas halto (+Afl. 8.0 million) y credito di proveedor (+Afl. 3.8 miyon), parcialmente mitiga pa menos debe a corto plazo na APFA (-Afl. 2.6 miyon).