Tin algun factornan cu por afecta e perspectivanan economico di Corsou na 2019, segun Banco Central.
Un di e factornan principal ta e vulnerabilidad di Corsou pa cu Venezuela, cu ta un di e partnernan principal di negoshi di Corsou.
E crisis na Venezuela por sigui afecta actividadnan den sectornan crucial di economia di Corsou, manera refinacion, turismo, haf y servicio financiero. Ademas, e crisis por aumenta e fluho di refugiadonan for di Venezuela y causa un problema cu Corsou lo no por soluciona su so. Un otro factor cu ta forma un riesgo pa crecemento economico di Corsou ta e futuro di refineria. Pa garantisa esaki ta di crucial importancia pa yega na un partner strategico pa e refineria ya cu esaki ta di sumo importancia pa economia di Corsou, tanto pa loke ta trata balor agrega como empleo. Mas tardansa den e proceso pa haya un partner strategico por afecta consumo y inversion priva.
Consumo lo por baha pa motibo cu institutonan financiero por ta menos inclina pa duna fiansa y credito na empleadonan di refineria of empresanan cu ta depende di e refineria. Terminacion di e relacion cu banconan coresponsal tambe por tin un efecto negativo riba crecemento na 2019, ya cu esaki lo impedi transaccionnan internacional y di e forma ey aumenta incertidumbre riba tereno macro economico. Otro riesgo pa e perspectivanan economico ta retraso den ehecucion di proyectonan di inversion priva dor di procesonan administrativo largo y burocracia. Por ultimo, tardansa pa implementa medidanan structural, manera reforma di mercado laboral y di capital, y reduccion di bareranan administrativo por stroba crecemento economico.
