Banco Central di Aruba (BCA) recientemente a conclui e encuesta di percepcion di negoshi pa e di tercer trimester di 2021. E encuesta di percepcion di negoshi ta evalua e percepcion economico di e negoshinan local, como tambe e impacto causa pa e pandemia di COVID-19 riba nan actividadnan di negoshi.
Durante e tercer trimester di 2021, e asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plaso, a nota un subida di 0,3 punto di indice te na 106,8 cual ta refleha un mehoracion den confiansa di negoshinan (Grafiek 1) nota [1]. Esaki ta debi na un fortificacion den e percepcion di negoshinan pa cu tanto condicionnan economico actual y a corto plaso.
E indice di condicionnan economico actual a expande cu 0,8 punto di indice te na 106,2 compara cu 105,4 den e di segundo trimester di 2021. E indice di condicionnan economico a corto plaso a registra un caida di 0,2 punto di indice, esta for di 107,7 den e di segundo trimester di 2021 te na 107,5 den e di tercer trimester di 2021 (Grafiek 2). E porcentahe di encuestadornan cu ta premira un crecemento economico positivo den e siguiente 12 lunanan, a nota un bahada, esta di 12,1 punto di indice te na 49,2 porciento. Mientrastanto, e expectativanan di un crecemento economico flat den e siguiente 12 lunanan a crece cu 11,9 punto di indice, esta for di 22,6 porcentahe den e di segundo trimester te na 34,4 porciento.
Pa locual ta e impacto causa door di e pandemia di COVID-19, BCA a amplia e encuesta di percepcion di negoshi, pa asina tambe evalua e percepcion riba su impacto ariba benta di negoshinan, necesidad pa aplica pa fondonan di emergencia y e expectativa di recuperacion economico.
Den cuadro di esaki, mester tuma nota cu aproximadamente 28 porciento di e negoshinan encuesta (27,9 porciento) a indica cu e pandemia di COVID-19 a sigui tin un impacto significante riba e benta di nan negoshi, esta 4,6 punto di porcentahe menos compara cu e di segundo trimester di 2021.
E informe completo di e encuesta di percepcion di negoshi ta disponibel riba website di BCA (https://www.cbaruba.org/).
Nota 1: E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu negoshinan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di negoshinan.
