Ayera a presenta oficialmente e serie nobo 2019 di biyetenan di florin durante un ceremonia den sede di Centrale Bank van Aruba, cu lo cuminsa su emision oficial dia 3 di juni. E tema principal di e biyetenan nobo ta ‘Bida na Aruba’, cu ta contene elementonan prominente di Aruba, como tambe caracteristica di siguridad mas avansa disponibel riba mercado, cu lo dura 30 aña.
Jeanette Semeleer, presidente di Centrale Bank van Aruba, a expresa cu despues di un trayectorio largo di shete aña, el a haya hopi emocion di comparti cu comunidad e serie nobo 2019. El a splica e diferente fase cu nan a pasa cu ayudo di hopi experto, bisando cu e tin confiansa cu comunidad lo namora y bira orguyoso di e serie di biyetenan 2019.
Tocante e fasenan, Semeleer a comenta cu a cuminsa na aña 2012 cu e prome fase di evaluacion, despues e fase di preparacion, fase tres di diseño, fase cuater di produccion, fase cinco legal y fase seis di emision.
Di manera aki Semeleer a papia tocante e cambio di diseño di e biyetenan actual cu esun di serie 2019. E diseño actual ta data di aña nobenta, y e ultimo adaptacion cu nan a haci tabata di 2003. Mientras tanto e standard di siguridad internacional a bira mas estricto y e diseño actual tin hopi parti blanco den dje.
Esun cu mester saca for di circulacion tabata e biyete di 10 florin, cual ta esun mas uza den comunidad. Nan a tuma e decision di cambia e serie, y a establece un comision interno encarga cu implementacion di e proyecto di biyetenan nobo di florin.
E biyetenan nobo tin caracteristicanan, por ehempel, reconocimento pa persona cu tin impedimento visual. Nan ta traha di materialnan duradero uzando e tecnologia mas avansa y elementonan di siguridad y tecniconan di provision.
Semeleer a duna di conoce cu CBA a haci un competencia pa e diseño di e biyetenan nobo. A crea varios tipo di hurado, esta publico, tecnico y artistico, esey a cuminsa cu seis artista local, di cual Nigel Matthew a resulta como ganado di e diseño final.
Semeleer a haci un reconocimento pa e trahadonan durante e trayectorio aki, por ehempel artistanan local, expertonan local e internacional di banco central, y asesornan di sector priva, como tambe e productor di biyete internacionalmente renombra, cu ta Crane Currency y otro colaborado cu tabata presente den e ceremonia.
Miriam Gonzalez, director ehecutivo di banco, tambe a expresa cu ‘Streanan di Aruba’, otro nomber di e biyetenan, tin un arte hopi bunita y cu hopi herencia y elementonan caracteristico di e isla. E letternan di e denominacion di e biyetenan ta mas grandi cu esun di aña 2003, di mesun manera el a bisa cu e ta espera cu e proyecto aki lo contribui na conscientisacion di tur loke Aruba tin y lo por tin.
E cronologia di emision di e serie nobo di 2019 di e biyentenan di florin ta lo siguiente:
3 di juni di 2019: Emision oficial di e serie nobo 2019 di biyetenan di florin
4 di juni te cu 11 di augustus 2019: Co-circulacion di e serie 2003 y e serie nobo di 2019
12 di augustus 2019: E serie 2003 di e biyetenan di florin ta sali for di circulacion y no por wordo usa mas pa haci pago.
4 di juni te cu 4 di december 2019: Por haci e cambio di e serie 2003 pa e serie nobo di 2019 solamente na e banconan comercial.
