Riba peticion di gobierno e banco di inversion AIB a haci un analisis riba kico e reapertura ta contribui na nos economia. E banco a entrega esaki awor y segun gobierno esaki ta mustra hopi positivo. Pero a basa di e informacion duna for di gobierno, no por mira cu ta tene impacto di e factornan externo.
E relato cu gobierno a manda riba e noticia aki ta mustra parti di e estudio, cu tabelnan cu cifranan unda tur ta indica cu e reapertura tin un impacto hopi positivo riba entrada pa gobierno, crecemento economico y cuponan di trabou. Algo cu gobierno ya caba riba su mes a publica pa convence entre otro parlamento pa aproba e leynan necesario y e contract cu Citgo. Sinembargo den e relato awor no por mira e efecto externo, entre otro di e doño di Citgo cu ta PDVSA. E situacion di e compania aki ta malo y recientemente a sali e noticia tambe cu gran parti di Citgo ta hipoteca na un filial financiero Ruso. Minister di Asuntonan Economico Richard Arends a comenta cu esaki no tin su impacto. Pero den e estudio di AIB, por lo menos e parti di informacion cu gobierno a divulga na prensa, no ta menciona e factornan aki. Bon Dia Aruba a puntra sr. Arends pa ricibi e rapport completo como cu gobierno a manda solamente un parti di e estudio den un relato pa prensa.
E minister aki ta bisa den e relato cu e resultadonan di e estudio ta confirma e analisisnan preliminar di gobierno. Ta trata di un aporte di 340 miyon florin na nos economia, entre 180 pa 200 miyon na financia publico y crecemento di 3,1% di forsa laboral.
E relato ta sigui cu:
“Pa 2017 ta proyecta cu e contribucion di e reapertura di CITGO na nos economia lo ta alrededor di Afl. 280 miyon, esaki ta 5.8% di nos GDP. Door di inversionnan planea door di CITGO, e efecto economico ta hopi grandi den e lunanan y añanan nos dilanti. E contribucion aki ta aumenta pa 6.6% na 2018 y 6.0% na 2019, te ora cu alcansa e porcentahe di 7.1% durante e prome aña di operacion na 2020.”
