Ban yuda Aljereau, un mucha cu ta sufri di autismo pa bay Hulanda

Joanna Croes ta un mama hopi activo riba rednan social cu dia pa dia ta publica videonan y potretnan di su yiu riba e Facebook page “Aljereau’s Journey” pa asina conscientisa Aruba su comunidad tocante e condicion di autismo y wak con nan mayornan tin cu lucha cada dia pa nan yiu por tin un miho calidad di bida.

Den un entrevista cu Bon Dia Aruba, Croes a conta cu Aljereau Tromp, ken tin 8 aña di edad, ta un mucha cu a wordo diagnostica cu autismo severo y pa via di e condicion aki nan kier cumpli un meta, bay biba Hulanda pa asina ey Aljereau, hunto cu su mayornan y su ruman muhe Loulou di 10 aña di edad, por bay biba Hulanda pa Aljereau por tin un miho bida ya cu su condicion cada dia ta bira mas dificil pa maneha.

Aljereau su mama a conta cu “e tabata un baby hopi independiente si y awo cu mi sa mas di su condicion te awo mi por realisa cu hopi cosnan cu e tabata haci for di baby tabata door di su condicion”.

Despues cu Aljereau a haci su prome aña el a ripara cu el a salta hopi tabu cual e cultura di Aruba ta bisa ta normal door cu e ta mucha homber y mucha homber semper ta floho pa desaroya compara cu mucha muhe y p’esey e como su mama pues no a preocupa mucho, pero poco poco el a cuminsa ripara cosnan cu si a preocup’e “e tabata morde riba tur cos, tur tur tur cos, el a kauw su cama cual tabata di palo, el a kauw e cama full y e tabata ‘selfharm’ (causa daño na su mes) masha hopi mes door di dal su cabes masha duro mes riba vloer, muraya, glas y tur caminda letterlijk”, el a bisa.

Aljereau tabata un baby cu nunca a gatia semper el a move manera un colebra y nunca gatia riba man cu pia, Aljereau tampoco a dal stap poco poco djis riba un bon dia el a lanta para y core.

Ademas e ta splica cu Aljereau nunca a papia, semper e tabata señala na loke e kier of haci zonido pa haya atencion y asina poco poco nan a forma un manera pa purba comunica “pero mas cu claro mas grandi e bira, mas frustrante e tabata bira pe y claro pa nos tambe”.

Poco poco Aljereau a cuminsa bira mas inkieto lo cual p’e como mama tabata mustra normal “te na e momento cu un dokter a duna mi e comentario ‘is hij altijd zo’? (semper e ta asina?) eynan ta caminda cu mi a cuminsa Google y busca informacion di kico por ta pasando cu mi yiu”, el a expresa.

Na e momento cu nan a haya e diagnostico di Aljereau, nan a hay’e riba un pida papel cu a wordo duna na nan y “pa mi ta sincero cu bo e diagnostico a trece mas pregunta cu el a trece contesta y aunke nos tabata sa caba den ki direccion su diagnostico lo tabata bayendo e momento cu nos a scucha e diagnostico oficial nos a yora y di berdad nos a sinti cu nos mundo a bin abou y no tanto pa e hecho cu autismo lo tabata algo malo sino mas bien pa e falta di ayudo, informacion y instancianan cu ta brinda ayudo completo pa muchanan cu e condicion aki” el a señala.

E sentimento cu nan como mayornan tabata tin e prome lunanan despues di Aljereau su diagnostico tabata algo cu nan no lo desea na ningun hende “p’esey mi a haci’e mi mision pa conscientisa tur hende eyfo, kico un famia cu tin un yiu cu e condicion aki ta biba cune, mi ta purba na duna tur e perspectivanan posibel dus di mi como mama, di mi yiu muhe como su ruman y tambe di su tata. Mi kier a conscientisa doñonan di trabou, hendenan den tur establecimento ora bo ta bay haci compras of loke sea y bo encontra cu algo asina pa nan sa di no husga pero acerca, puntra, duna sosten y no duna comentarionan doloroso ni miradanan di desprecio cual nos ta lidia cune te ainda, a mi cu mi pareha a medio haya e cuero duro caba pa esey pero mi yiu muhe ainda no y eseynan ta haci’e hopi dolor” el a conta.

Aworaki, Croes a informa cu nan ta bendiendo un rifa pa por hiba Aljereau Hulanda, di esaki, el a menciona cu e decision no tabata un decision facil pero nan ta haya cu ta super necesario.

“Actualmente mi ta purba di haci hopi mi so pero mi tin tur dos mi mannan den brace cual no ta haci’e hopi facil paso mi ta haya hopi hopi dolor pero mi ta haciendo mi best pa logra mas cu mi por y mi ta acerca tur lector pa acerca nos y cumpra e rifa y yuda nos duna Aljereau un miho futuro aya na Hulanda”

Te ainda Aljereau no ta papia, e tin hopi problemanan sensorial, e no ta consciente di loke ta rond di dje, su tolerancia di dolor ta hopi halto e cual por crea problema grandi pa su salud, e no tin miedo di nada y ainda e ta ‘selfharm’ masha hopi mes, “Aljereau ta morde su mes, e ta dal, kinipi y rasca su mes hopi mes y claro ora mami purba stop e di haci’e mami tambe ta haya”

Como famia, esaki a afecta nan inmensamente hopi, el a haya dos burnout basta pisa pa e cual ainda e ta riba medicamento pa esey, como pareha tambe e situacion a pone un presion extra riba nan tanto financieramente, emocionalmente, mentalmente “y claro nos relacion a bay atras masha hopi mes pero semper tabata tin algo cu a pone nos yega bek na otro y awo door di hopi terapia nos por a compronde cu hopi biaha nos pleitonan tabata door di tur e presion extra cu nos tin pero poco poco nos por mira past esey awo”, Croes a bisa.

Pero loke ta preocupa nan mas ta nan yiu muhe grandi, “e cual ta stima Aljereau masha masha hopi mes, e ta echt cuid’e, preocupa p’e, yud’e, siñ’e y e ta su advocate di mas grandi pero e ta keda un mucha tambe y Aljereau su condicion ta haci’e dolor y e ta sufri hopi pa esaki, e ta wak e miradanan di hende den supermercado, e ta haya comentario di otro muchanan, tin rato e ta sinti cu nos ta duna su ruman mas atencion, mas privilegio y esey ta haci cu hopi biaha e ta cuestiona si nos ta stim’e y claro e ta exigi tur atencion di mundo”

Hulanda ta un idea cu nan tabata lucha cune for di hopi tempo caba pero nan tabata pensa cu e no ta husto cu nan mester laga nan luga pa haya ayudo pa nan yiu y na mas cu un ocasion nan a sinta cu diferente hende pa por haya e ayudo cu nan mester, “pero semper tur cos a keda na promesa y nada mas, dus nos ta sinti cu nos no por sigui sacrifica nos yiunan a base di esey.

E ta considera cu Hulanda lo brinda tur e ayudonan cu nan mester no solamente pa Aljereau sino pa nan tur, door di sondeonan cu el a haci pa por a saca afo cu berdad ta importante pa atende e persona cu e condicion pero “e ta hopi importante tambe pa atende cu tur hende cu ta rond di e persona ey tambe, e famia direct ta haya hopi ayudo cu terapia, cu cuido pa esun cu e condicion pa asina por tin atencion y tempo pa e resto di famia tambe”.

Croes su mensahe mas importante ta cu e lo kier laga sa pa ta mas consciente ora hende ta riba caya y ta wak un situacion caminda un mucha ta grita, sapatia, dal of yora “no semper asumi cu e ta mala mucha of e ta na su kier, purba wak rond di dje, mustra empatia, brinda un ayudo y si bo no por yuda ta ok djis no husga, no duna comentarionan doloroso of miradanan di desprecio paso kisas mami y papi no a wak pero e otro chikito na banda si a tuma nota di bo comportacion y ta haci’e dolor” Croes a finalisa.

Pa por cumpra e rifa por tuma contacto cu Joanna Croes na e telefon 565.5160, e ticket tin un costo abao, cu cual por gana diferente premio como un Weekstay na Merca of un dinner pa 2 persona.