Recientemente, Minister di Husticia y Asuntonan Social sr. Rocco Tjon, tawata presente na e evento di “let’s plant for mental health”, pues ban planta pa salud mental, un iniciativa sumamente bunita for di e cadena social den conexion cu dia mundial di salud mental. Ta asina cu nos profesionalnan den e cadena social cu ta atende cu e tematica di salud mental, a uni hunto cu e organisacion “Trees for Aruba” pa asina hunto planta mata como simbolo di conscientisacion pa cu salud mental.
E tematica di Salud Mental ta toca nos tur, y e no ta discrimina, tampoco e ta haci distincion, pa cual motibo tambe e ta hala atencion di tur hende den nos comunidad. Manera ta conoci, siman pasa nos tawata presente como Aruba na e di cinco “Global Mental Health Summit” na Argentina, y mes ora nos por a ripara cu e retonan pa loke ta trata salud mental ta igual na tur parti di mundo.
Locual ta resalta mas entre varios pais, ta e scarsedad di personal, e necesidad pa kibra e stigma, e importancia pa programanan social pa brinda sosten y tambe e enfoke multi-sectoral cu ta hopi necesario. Esaki ta e motibo pakico na Aruba nos a introduci e stuurgroep GGZ, pa di e forma ey hunto cu tur profesional nos por percura pa un miho coordinacion y duna contenido real na e enfoke multi-sectoral.
Algo hopi importante pa salud mental por keda riba agenda ta, pa nos tur keda papia di e topico, pa di e forma ey nos logra kibra e stigma. Eventonan manera “Let’s plant for mental health” ta percura pa nos logra esaki.
Por ultimo, e mandatario a manda palabranan di pabien y gradicimento na henter e personal cu ta labora den e area aki. E trabou aki ta uno dificil, hopi biaha un trabou cu no ta wordo balora door di comunidad. Y como Gobierno di Aruba, nos ta balora y aprecia e trabou aki inmensamente, semper laborando na e bienestar di nos comunidad.
