Nan sa bisa cu na Aruba nos ta – colectivamente – bon den lubida cos cu no ta conveni nos. Esey por ta berdad pero nos no ta kere cu nos ta e unico pueblo cu e caracteristica ey. Di tur manera, ta bon pa cada tanto tempo nos repasa e asuntonan cu a keda sin cumpli den pasado, o cu tin un promesa di mehoracion pendiente ainda. Ya cu nos no por atende aki e asuntonan pendiente individual, esey ta na cada un di nos, nos ta bay repasa e cosnan pendiente cu ta toca nos tur.

Por ehemplo a caso di malversacion y robo di nos placa na Setar NV. E tempo cu a descubri e delitonan cometi pa un funcionario di e compania, cu despues a haya tur oportunidad pa huy di Aruba y busca un refugio comodo na sur di Merca, a keda pendiente un caso hudicial, penal, contra su persona na Aruba mes. Sin duda algun el a comete delito segun ley Mericano, pa cual tabatin/tin caso penal contra su persona y otronan cu ken el a conflocha pa perhudica nos. Pero tambe ta obvio cu tin delito cometi aki na Aruba, como empleado di e compania estatal. Manera nos tabata teme e tempo ey caba, aparentemente no tabatin ‘follow up’ aki, y cu esey a keda e pregunta colga den aire, kico ainda por spera di Ministerio Publico.

Naturalmente nos ta corda e reaccion di e tempo ey di e ministerio, cu nan ta wardando pa e compania bin haci denuncia, algo cu aparentemente nunca a sucede. Sin embargo, ministerio publico no mester haya denuncia den un caso di asina gran importancia, mientras cu loke a sali den medionan di comunicacion ya tabata suficiente pa cuminsa, cu interes general na bista, un investigacion hudicial preliminar (justitieel vooronderzoek). Realmente nos no ta mira un hustificacion pa no haci esaki, y ta e mesun ministerio publico a duna nos e motibo pakico.

Nos por corda cu den e caso Ibis e propio ministerio a bisa cu nan a topa riba Facebook cu cierto indicacion di posibel delito di banda di e ministro e tempo ey encarga cu labor, loke tabata suficiente pa cuminsa tal investigacion preliminar. Tabatin denuncia formal haci caba na e momento ey, cu prueba palpable riba mesa, cu tabata hustifica mas investigacion? Di loke nos a tende di nan mes, esey no tabata e caso…ainda. Sin embargo, ningun hende ta cuestiona e proceder den e caso Ibis, y corectamente, pasobra a cuminsa un investigacion preliminar, cu despues a duna resultado, anto con…

Awor, pa bolbe na e caso di miyones horta di nos, pasobra manera Setar NV su lema mes ta bisa, cu e ta ‘di nos’: ta miyones di perhuicio financiero a ser cometi contra nos, y esey no por keda impune. Por bien ta cu e persona lo haya su merecido castigo na Merca, pero esey no mester libra e persona di accion hudicial na Aruba unda tambe a comete crimen. Ademas, ningun momento nos a haya di tende cu ta wardando cu un caso hudicial na Aruba te cu caba cu e proceso na Merca, loke ademas no ta zona nos asina logico tampoco. E pregunta anto ta, ki dia ta clarifica e estado di e asunto aki, pasobra manera e ta awor e no por keda.

Otro caso cu nos ta kere di ta digno di investigacion ta e aparente mal maneho di propiedad publico den e cartera di Obra Publico y Infrastructura den e gabinete anterior, di cual nos a mira publica bastante material preocupante, cu por lo menos ta duna un indicacion di cos contra ley cu por a tuma luga. Un investigacion asina ta importante, pasobra no ta trata solamente di hecho castigabel cometi si o no, pero tambe di buraconan cu tin den legislacion cu ta haci posibel pa gana placa bruto bendiendo propiedad publico (tereno erfpacht) cu a haya gratis, pa sumanan astronomico cu tercera persona. Ta trata pues tambe di coregi e asuntonan aki den nos legislacion pa e tipo di acto bochornoso aki no por continua. Awor, nos ta na altura cu tin un investigacion andando riba deseo di parlamento, di cual na e momento no tin nada conoci ainda. Ta di spera cu e resultadonan, cualkier cu nan ta, lo ta conoci pronto, pa ministerio publico por procede segun nan tarea y autoridad, pa tuma e pasonan necesario.

Tin otro asunto pendiente ainda, pa varios aña, y esey ta e estado di nos facilidad penitenciario. Atrobe Aruba, hunto cu nos isla hermana, ta den luz negativo den Reino, tanto pa e estado di nos facilidadnan, como pa e trato di preso, tambe den e caso di detenido cu ta reclama estado di refugiado. Nos no mester di bay aki den tur detaye di e asunto, pero ta obvio cu tin hopi trabao atrasa, cu pa un of otro motibo nos mandatarionan no ta atende, y esaki den curso di varios gabinete caba. Critica riba esunnan di pasado por ta hustifica, pero ta keda inutil pasobra nan no t’ey mas, y hasta for di nan puesto nobo ta aparece awor como e ‘beste stuurman aan wal’. Laga esun actualmente den e ‘driver’s seat’ actua, y cu diligencia.