E artista femenino Robyn Rihanna Fenty, artisticamente conoci manera Rihanna, a caba di wordo declara como e e artista femenino di mas rico na mundo. Segun Forbes, Rihanna tin un balor di 600 miyon dollar, un fortuna considerabelmente grandi den comparacion cu otro artistanan femenino manera Madonna, Celine Dion y Beyonce.
Segun e fuente CNN, aunke Rihanna ta conoci pa su hitnan mundial manera “Umbrella”, “Diamonds” y “What’s My Name?”, su musica no ta e unico fuente di entrada financiero. Defacto, Forbes ta bisa cu e mayoria di su entrada ta bin di e partnership cu e tin cu LVMH, e compania Frances cu ta doño di marcanan luhoso manera Christian Dior, Givenchy y Louis Vuitton.
Luna pasa, Rihanna, kende ta procedente di e isla di Barabados, a lansa su propio fashion label bou di e nomber ‘Fenty’. Cu esaki, e ta bira e prome muhe color scur cu ta crea un marca original cu LVMH.
Den un comentario duna dialuna ultimo, Rihanna a bisa cu na e momento aki e ta disfrutando locual cu e ta haci. E ta bisa di no ta enfoca riba e placa, paso esey segun e, “ta bin di su mes den e proceso”. “Muhenan ta e forca di mundo. Nos ta multifacetico, compleho, vurnerabel y na mes momento fuerte, y ta esey mes ta loke Fenty ta representa”, Rihanna a bisa.
