Miho hinca energia den otro alternativa
E caso den corte contra actual directiva di partido Democracia Real a termina na un manera predicible. E directiva actual a haya rason y e directiva ‘nobo’ proclama na januari no por tuma nan luga. De paso tambe Camara di Comercio a haya rason di a nenga di registra e directiva ‘nobo’ cu tabata desea di substitui e otro y asina crea e posibilidad di bay eleccion e aña aki bao di e nomber ey. Esey a bira imposibel y cu dos dia apenas pa pensa alternativa, dia 22 di juni ta deadline pa confirma participacion den eleccion venidero, e opcionnan no ta hopi. Formalmente tin entendi cu ainda ta posibel pa reactiva e partido Alianza, cu den pasado a opera cu participacion di e mesun persona cu awor tabata desea di lidera e lista di PDR. Nos lo mira, ‘a su debido tempo.’
Basicamente, nos no ta lamenta ni alegra cu loke a sucede den corte den e caso aki, pero ta desea di enfoca riba algun otro aspecto. Presenciando e argumentacion di ambos parti dilanti hues, loke a bin dilanti di e bida interno di e asociacion no ta di gaba. Pregunta di hues pa lista di miembro a duna dos version distinto, aunke mester bisa cu statutonan tabata masha cla riba e asunto di ken ta miembro y ken no. No, e problema cronico cu nos ta mira den e tipo di caso aki ta e cultura interno den cual cumplimento cu regla ta parce practicamente irelevante. Asina a sali na cla cu desde 2009 caba no tabatin un asamblea general di miembro. E impresion cu ta haya ta cu e asociacion, leu di ta un organismo bibo cu ta atrae persona cu ta desea di ta envolvi den e actividadnan di e partido, e ta parce mas bien un formalidad pa cumpli cu ley, y nada mas. Esey ta un problema grave? Pa e partido aki no. Di tur manera nos por supone cu e partido aki no ta bay eleccion y cu e ta bay ‘sosega’ mescos cu varios otro cu ta ainda den e registro oficial di partido politico. Loke nos kier ilustra ta cu e bida organisativo di hopi asociacion (y fundacion) den nos comunidad ta colga hopi na e actividad di solamente un par di persona. Kico ta e problema di esey? Cu como nan ta nan so, ta dicidi y haci sin tene mucho cuenta cu e formalidadnan cu cual mester cumpli.
Y dia cos mester yega asina leu cu mester bay corte, ta resulta den problema. Pero no ta trata solamente di corte, tambe otro formalidad cu mester tramita ta duna problema si cosnan no ta regla manera mester ta. Esey e directiva ‘nobo’ cu kier a inscribi nan mes na Camara di Comercio mester a ripara. Ta facil pa tene un reunion (di cual hues a bisa cu e no tabata legal) y yega na KvK cu e noticia cu tin un directiva nobo. Pero formalidad ta formalidad y mester proba cu a cana e caminda corecto. Y esey no tabata e caso. E sentencia ta mustra cu e directiva ‘nobo’ no a convoca e asamblea general na e manera corecto.
Bo no por supone cu simplemente tur hende cu bo ta kere cu a bay e otro partido nobo, no ta miembro mas. Den corte caba hues a puntra a base di kico e directiva ‘nobo’ a kere cu e ta autorisa pa dicidi riba e lista di miembro y cu e por convoca reunion general ignorando e directiva actual. Realmente e preguntanan skerpi ey di hues tabata casi un anuncio di loke el a pone den su veredicto awor. Bo no por sinta riba stoel di directiva prome cu bo bira directiva na un manera legal. Kico nos por siña di tur esaki? Cu e manera di regla cos, sigur den organisacion chikito, hopi biaha ta demasiado informal. Ta djis un par di hende, anto e tendencia ta bira masha lihe mes di ‘si abo haci esaki, anto ami ta haci esaya.’ Te dia bin problema, nunca a formalisa decisionnan tuma, administracion financiero ta un ‘shambles’ (nos no ta referi na e caso aki), no tin claridad riba miembresia, etc. Y kico lo sucede riba tereno politico? Cu e veredicto aki, caminda a keda liber pa e lider bay den e alternativa nobo pa cual el a scoge, sin mester preocupa pa su partido bieu bao liderazgo di otro persona. Di punto di bista di ‘damage control’, bon trabao.
Pero e ganashi mas grandi ta cu por pone e episodio aki den pasado. Pasobra politica ta keda principalmente e presentacion positivo di plannan pa futuro, y den esey un caso asina ta un gran estorbo. Den e sentido ey, pa ambos banda, e conflicto aki tabata mas cu tur cos un enorme desperdicio di energia, cu por a uza miho.
Si realmente tabata desea di tin un partido politico cu ta mustra radiante y positivo, lo no tabata miho pa a cuminsa algo otro di cuminsamento di aña caba, na luga di bringa pa sapato bieu?
