Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a continua den gran forma. Den categoria AA masculino e ekipo di Balashi Premuim kende a caba di batisa nan uniform nobo recientemente a sa di sali riba bon pia pa locual ta trata campeonato oficial di Aruba Softball Bond.
E hoben pitcher prometedor den desaroyo Giancarlos Gomez ta lansa un “No Hit No Run” contra Piratas pa asina seya e prome victoria riba su nomber. E veterano Johannes “Poy” Flanegin kende a reforsa e ekipo Piratas cu a titula campeon 2016 y a subi pa AA a bay cas cu e derota. Balashi Premuim 4 careda, 8 hit, 1 eror. Piratas 0 careda, 0 hit, 2 eror. Miho batiadonan pa Balashi Premuim a resulta Nathan Berkel 3-3, Sando Geerman y Marc Danies ambos di 2-1. Den e di dos wega pa completa e dobel header di anochi Piratas a mustra mucho mas miho y a faha e hobennan di Balashi fuertisimo pero no por a bin cla pa converti esaki den un victoria.
Balashi hungando bon bala ta seya nan di dos victoria di anochi. Balashi Premuim 9 careda, 13 hit, 2 eror. Piratas 7 careda, 7 hit, 2 eror. Jorge Santana ta bay henter e ruta y ta resulta pitcher ganado mientras Guillermo Montiel ta bay cas cu e derota. Miho batiadonan pa Balashi ta Nathan Berkel di 4-3 kende ta start campeonato “super hot” cu 6 hit den 7 turno den prome dos weganan, Gerald Werleman tambe a bay di 4-3. Juan Arango y Djurwin Croes ambos di Balashi a conecta un cuadrangular. Pa Piratas a destaca na bate den causa perdi Jonathan Perez 3-3 y Ramon Gonzalez di 2-1. Campeonato ta continua Diasabra atardi 5pm na Pos Chikito cu 2 wega femenino y ta continua diadomingo mainta 11am na Kudawecha cu 2 wega Femenino mientras dialuna 29 di mei pa 715pm na Pos Chikito lo bay tin 2 wega valido den categoria A-Klas masculino. Pues campeonato di Aruba Softball Bond den pleno desaroyo.
