Ex ministro di Grand Bahamas, Dr Michael Darville, a bisa diabierna pasa cu e ta sumamente preocupa cu cierto condicion den un ‘heads of agreement’ cu gobierno di Bahamas a firma cu un compania yama Oban Energies, pa construi un refineria di varios biyon dollar y un terminal di crudo na Grand Bahamas.

Darville, cu tabata forma parti di e gabinete di prome ministro Christie, cu a acorda e proyecto en principio, a bisa cu e hecho cu gobierno di prome ministro Minnis a firma e acuerdo sin cu tabatin un Environmental Impact Assessment (EIA) ta un asunto di peso.

Di acuerdo cu e convenio, cu tabata riba agenda di parlamento diahuebs pasa, gobierno lo no por termina e acuerdo basa riba cualkier EIA, pero lo mester traha cu e compania pa mitiga e preocupacionnan. E clausula aki ta un preocupacion grandi pa Darville. E ta haya cu gobierno mester a haci su due diligence pa sigura cu e EIA tabata adecua pa e luga proponi prome cu firma. Pa purba sali di e asunto awo, por implica caso den corte o algun otro problema si nan purba di sali di e deal, segun Darville.  A resulta despues di e firmamento cu e clausula ta existi. E firmante pa Oban, Peter Krieger a sigura cu e informe di impacto ambiental lo ta cla den 45 dia.

Gobierno a firma e acuerdo cu un persona intermediario, Peter Krieger, cu no ta aparece riba lista di empleado di e compania Oban Energies. Critica tabatin tambe riba e persona Peter Krieger, cu ta bisa cu e no tin un posicion oficial den Oban Energies pero cu e ta un ‘tipo di embahador’. A aparece den diferente articulo prueba cu Krieger tabata envolvi den diferente caso na Merca di desfalco, entre otro. Den un di e casonan el a paga pa un areglo den e demanda contra su persona. E acuerdo ta bisa cu ora e compania termina e EIA, e gobierno tin 60 dia pa reacciona. Di su banda si e compania tin e derecho di bandona e proyecto. Darville a bisa cu e lo no a firma e acuerdo sin un EIA riba mesa pa sigura cu e proyecto ta viabel y cu protocolnan di siguridad ta aplicabel pa proteha medio ambiente den e area sensitivo unda e proyecto ta bay ta.

E proyecto ta trata di construccion di un refineria y un terminal pa warda crudo y producto petrolero. E proyecto ta encera un inversion di US$ 5,5 biyon, pa un refineria di 50.000 bari pa dia di capacidad, y un facilidad di deposito di 4 miyon bari. ceOban Energies LLC ta un compania registra na estado Florida, y estableci na Palm Beach Gardens. No tin indicacion cu esaki ta un compania cu e capacidad tecnico y financiero pa ehecuta un proyecto asina grandi, cu normalmente ta pa e empresanan mayor den e sector petrolero.