Federacion Internacional Cruz Cora y Media Luna Cora (FICR) ayera a comunica e hipotesis cu cual lo enfrenta e situacion humanitario na Bahamas, despues di e dañonan causa pa e horcan poderoso Dorian, ‘cada persona’ na e islanan Gran Bahama y Ábaco lo mester ricibi algun tipo di ayudo.
Te na e momento, e organisacion a plania pa centralisa e prome ayudo na 20.000 persona, cu atencion special na isla Ábaco, ‘pasobra nos ta compronde cu eynan ta concentra e poblacion mas vulnerabel cu lo mester di un significativo asistencia pa recupera di e desaster aki’, e vocero di e organisacion na Ginebra, Matthew Cochrane a sigura.
Otro dato cu a ser conoci den ultimo oranan ta cu casi 62.000 persona na Gran Bahama y Ábaco lo rekeri di awa potabel, pa motibo di inundacionnan grandi cu a contamina e sistema distribuido di awa cu awa salo.
“Ora no tin awa despues di un desaster di e magnitud aki, lo por tin grave efecto secundario” e vocero a splica.
Di dos elemento mas urgente di e prome etapa di e catastrofe ta e alohamento, ya cu al menos 13.000 cas a keda destrui of nan a keda daña gravemente, loke ta representa e 45% di tur e vivienda na e dos isla, el a agrega.
Di su banda, e Programa Mundial di Alimento, e brasa humanitario mayor di ONU, a manda cuater specialista di areanan di siguridad di alimentacion, telecomunicacion di emergencia y logistica pa yuda e Gobierno realisa un rapido evaluacion di e situacion, cu lo bay ta cla den tres dia.
