Den e simannan cu a pasa nos a toca diferente tema, esta energia, agricultura y salubridad. Awe nos lo toca un tema importante cu ta un soño di hopi hende riba nos isla: Pa ta doño di nan mesun hogar. Na e momentonan aki e soño aki a bira uno leu dor cu prijs di construccion a hisa den manera barbaro den e añanan cu a pasa. Pero den e ramo aki tambe nos por wak solucionnan riba nivel di innovacion: Esta 3D Printing di Cas.
Kico ta 3D Printing?
3D Printing ta usa tecnologia digital pa tuma un file, y ta letterlijk print algo fisico den un forma di “layer-pa-layer”. E tecnologia aki ta wordo uso hopi caba den areanan di Aerospace, construccion di parti di metal sofistica y pa print modelonan di auto of boto.
Den nos caso nos lo papia di 3D Printed Housing.
Usando e mesun concepto, pero den e caso aki cu un printer hopi grandi y usando un mix di concret sofistica por “print un cas”. E bentahanan ta hopi grandi. Na prome lugar un cas lo por wordo construi den letterlijk 1-2 dia, den forma full automatisa usando tiki supervision humano. Dus e prijs di labor y construccion lo baha den manera radical y tambe e velocidad di por cla cu un cas dentro di 2 dia ta trece bentaha grandi riba su mes. Ademas e cantidad di desperdicio cu e construccion lo trece cune lo ta sumamente mas abou dor cu e printer ta usa precies a cantidad di concret cu lo mester pa construi e cas.
Cuanto un 3D Printed Cas ta Costa?
Awo manera e titulo di articulo aki ta sugeri ta e prijs di construccion usando e tecnologia aki lo ta hopi beneficioso den perspectiva di prijs pa e consumidor. E prijs di un cas di 3D print ta varia dor di diferente factor, locual ta si e ta un proyecto mas grandi unda lo print varios cas manera 10-30 cas den un solo proyecto, cu lo baha e prijs pa cada cas y dus e prijs pa cada m2 di construccion. Tambe si e cas ta un of dos piso. E tecnologia di 3D Print cas di 2 piso a wordo ehecuta na Belgica den un proyecto, pero e parti aki di e tecnologia ta experimental ainda.
Pensando cu e tecnologia aki lo ta perfecto pa casnan den ramo social of cas di pueblo nos por wak usando varios fuente cu CyBe Construction cu por traha un cas di 104m2 pa solamente $23.000,- US cu ta ongeveer 390,- florin Awg per m2. Considerando cu e prijs mas abou di construccion na Aruba ta ongeveer 1700 florin pa m2, e tecnologia aki ta mas cu 75% mas barata cu metodonan di construccion actual.
Factornan pa haci Cas “Sustainable+”
Na Aruba e factor cu ta e usa di coriente pa un hogar tin te maken hopi cu tene e cas su interior na un temperatura confortabel. Usando “Anti-InfraRed-Paint” manera designa na Purdue University, por verf cas cu e verf special aki pa haci e cas di su mes hopi mas friu relativamente.
Combina esaki cu panelnan Solar di generacion nobo, ni papiando di esunnan di Perovskite cu lo bin dentro di 5 aña, por haci cu tur cas nobo por genera su mesun coriente den manera sostenible. En fin uso di Airconan di generacion nobo cu experimentonan a mustra cu ta mas cu 40% mas eficiente cu airco regular.
Cu e vision aki di 3D Printing pa cas y tecnologianan “Sustainable+” por crea un nivel hopi halto di bida social pa esnan na Aruba cu kier traha nan propio hogar y cu gastonan mensual di coriente no-exsistente.
