KvK riba plan aumento salario minimo:

Baha gasto di gobierno y haci investigacionnan prome cu hisa salario minimo. Esey ta e comentario di Camara di Comercio (KvK) riba e plan di minister di Labor pa hisa e salario minimo. Nan kier enfatisa tambe cu nan no ta necesariamente contra.

Ernst Mohamed, presidente di Camara di Comercio ta bisa cu nan tin un solo punto di bista pa locual ta henter e asunto aki. “Nos kier a conseha minister di Labor pa wak prome cu haci algo asina: ki dia e ta planea pa haci esaki? Ki suma e ta planea pa introduci anto si a investiga consecuencianan di un decision asina.” KvK ta enfatisa cu nan no ta contra aumento di salario minimo, al contrario nan ta haya cu tur hende merece di berdad pa biba bon na Aruba. Pero, pa haci esaki e poder di compra mester t’ey. Si mester haci algun tipo di decision den e area aki sin investigacion debido, por tin consecuencianan sr. Mohamed ta trece dilanti.

Randall Croes, miembro di directiva di Camara di Comercio ta bisa cu mester interpreta Aruba manera un negoshi, anto den un negoshi tin espacio pa mehora pago di bo trahadonan ora cu bo ta bende mas. Den economia di Aruba, esey ta loke tur negoshi di Aruba ta factura na benta, certifica, y for di eynan por haci cambionan. “E expectativanan si bo gastonan ta bay subi den futuro, ta haci tur empresario pa wak bon si ta tuma hende na trabao y si gastonan ta subi. Nos tin un sector hotelero cu tin cu competi cu hotelnan estableci na otro paisnan caminda salario minimo ta un mita of menos di esun di nos, tur salarionan ta menos. Nan gastonan di operacion ta hopi mas abao cu di nos pero nos mester competi cu nan toch. Pues nos mester tin hopi cuidao ora cu ta toca parti fundamental di costo di nos hotelnan. Pasobra placa tin cu sobra pa paga impuestonan pa gobierno haya su parti.”

Baha gastonan di gobierno
Manera un organo di conseho pa nos economia y pa gobierno, Camara di Comercio kier puntra gobierno pa kico no ta cuminsa na wak pa baha gasto di gobierno prome cu hisa salario minimo. Por ehempel, si mira e costonan di awa y coriente, transporte, y invoerrechten pa mira ki efecto esakinan tin pa e persona cu ta cobra salario minimo. Tambe cu Citgo su impacto riba nos economia cu ta mustrando di no bira esun cu tabata desea, e ora ey tur parti di nos comercio mester cuminsa pronostica kico mester haci pa compensa kico ta perdiendo.

“Es mas, si bo wak bon, nos gobierno mester funciona awor manera un negoshi,” sr. Mohamed ta comenta. E ta sigui bisa cu tur CEO cu drenta un negoshi ta baha nan gastonan si ta perdiendo placa, unda normalmente ta empleado nan ta kita. Esaki tabata algo cu partidonan den coalicion di gobierno a campaña tambe durante eleccion unda entre otro nan a bisa cu bahando cantidad di coordinador ta un di e prome cosnan cu lo haci pa cuminsa baha gastonan di gobierno. “No cu mester kita tur empleado, pero si bo ta cuminsa wak den bo mesun seno ken no ta contribui anto unda bo por ta mas eficiente, e ora ey bo ta baha bo gasto y haci cu bo situacion ta bira mas rendabel. Anto asina comercio tambe ta bira mas rendabel.”

E financiamento di sector priva pa sector publico ta bira incansabel, e gastonan ta bira mucho halto y comerciantenan a lo largo no por mantene esaki mas. Tambe, Camara di Comercio ta conseha gobierno pa consulta nan mes, Raad van Advies, SER, ATIA pa hunto sinta y traha un plan con por haci esaki na un manera cu tur hende tin beneficio di dje.
“Pasobra si bo ta bay hisa un salario minimo, anto comercio ta hisa prijs, manera nos a bisa aña pasa, ta unda e spiraal aki ta bay keda? Si bo ta bay haci esaki bo tin cu haci e na forma cu comerciantenan no ta bay hisa nan prijsnan, anto esey ta e meta di Camara di Comercio.”