(AP) – Bad Bunny su ex pareha ta demandando e cantante pa por lo menos 40 miyon dollar pa un grabacion hopi conoci cu el a provee e cantante prome cu el a bira famoso.

Carliz De La Cruz Hernandez, ken su grabacion bisando e frase “Bad Bunny, baby” ta inclui den dos di e cantante su canticanan, a bisa den corte na Puerto Rico cu su bos y e frase cu el a crea ta den uso sin su permiso.

E demanda, cual a keda reporta prome pa Puerto Rico su noticiero Noticel, a nota cu a usa e frase den e cantica “Pa Ti” cual tin mas di 355 miyon bista riba YouTube y mas di 235 miyon reproduccion riba spotify. Tambe a usa e frase den e cantica “Dos Mil 16”. E demanda ta bisa cu De La Cruz su bos unico tambe ta den uso sin cu consentimento den canticanan, promocionnan, conciertonan mundial, television, radio y plataformanan di rednan social. “Desde e tempo aki, miles di persona a comenta directamente riba Carliz su rednan social, ademas di cada biaha cu e ta bay un sitio publico tocante e frase. Esaki a causa y actualmente ta causando cu De La Cruz ta sinti preocupa, intimida, abruma y ansioso,” e demanda a splica.

Tambe den e demanda ta nombra Noah Kamil Assad Byrne, ken ta manager di Bad Bunny, ken su nomber real ta Benito Martinez Ocasio. Assad y representantenan di Bad Bunny no a comenta tocante esaki.

De La Cruz y Martinez tabata un pareha den aña 2011. Un aña despues, nan a cuminsa studia na University of Puerto Rico den Arecibo mientras nan tabata traha. E demanda ta bisa cu durante e tempo aki, Martinez constantemente tabata crea canticanan y ritmonan y tabata pidi De La Cruz pa su opinion, ken tambe tabata encarga di e schedule di fiestanan y contractnan.

E creacion di e frase a tuma luga den 2015, ora cu Martinez a pidi De La Cruz pa graba su mes ta bisa e frase. Nan relacion a termina den april di aña 2016 ora cu Martinez a firma contract cu Rimas Entertainment y De La Cruz a keda acepta na e University of Puerto Rico su scol di ley.

Segun e demanda, den mei di 2022 un representante di Bad Bunny a acerca De La Cruz y a bisa “mi sa bo no gusta papia di Voldemort (referencia na Martinez), pero mi kier puntra algo.” Den e yamada aki el a ofrece De La Cruz 2,000 dollar pa cumpra e grabacion di su stem. De La Cruz a rechasa esaki y despues a papia cu un persona na Rimas Entertainment cu tambe a ofrece pa cumpra esaki, bisando cu e grabacion lo ser usa den e album binidero “Un Verano Sin Ti,” segun e demanda.

Sinembargo nunca a yega na un trato, y e cancionnan a keda publica sin cu De La Cruz a duna su consentimento pa esaki segun e demanda.