E cantante Portoriqueño di 26 aña di edad, Bad Bunny a sorprende su siguidonan door di ta riba e portada di e edicion mas recien di e revista Mericano, Rolling Stone, den cual e cantante ta aparece cu un mondkapje, esencial na momento di yuda evita transmision di COVID-19.
Den e entrevista cu e famoso medio el a duna algun detaye di e plannan cu e tin pa e aña aki, entre nan, aparece den e serie ‘Narcos’ riba Netflix. E cantante di e hit ‘Yo perreo sola’ ta spera cu e situacion lo cambia den e siguiente lunanan, pa asina e por termina su escenanan.
Benito Martinez, nomber real di e cantante, a comenta cu algun siman prome cu su presentacion den Super Bowl cu Shakira, J Balvin y JLo, el a graba varios escena pa e di cuatro temporada di e serie. Sinembargo, su participacion a keda incompleto pasobra e pandemia a stop grabacion di e programa.
Bad Bunny a bira un tendencia como e prome cantante di musica urbano cu a sali riba portada di Rolling Stone. E imagennan no a wordo saca pa ningun fotografo profesional. E persona encarga tabata nada menos cu pareha di e cantante, Gabriela Berlingeri di 26 aña di edad.
E interprete a celebra su portada di Rolling Stone cu un mensahe pa su miyones di siguido riba Instagram: “Esunnan cu ainda no ta compronde, algun dia lo hacie. E chamaquito di Vega Baja riba portada di Rolling Stone. Ami niun, niun, niun pero niun hende, por bisa mi kico mi por y no por haci, mi ta haci loke mi kier. Y desde mucha, mi a haya gana di ta grandi, mi a haya gana di sigui y traha pa mi soñonan. Danki na tur cu a kere, cu ta kere, y cu algun dia lo kere.”
