Ayera mainta Baby Beach a manece diferente cu tur otro dia, horcan Beryl tabata atravesando Caribe y lagando efectonan chikito riba nos isla caminda Bon Dia Aruba a logra di saca algun videonan pa asina mustra con lama tabata e dia di ayera.
Den e videonan ta ilustra cu lama tabata basta bruto unda e olanan a yega unda e palapanan ta ubica y tambe por mira cu a yega basta cerca di e restaurant basta conoci ubica na e beach aki.
Meteo Aruba a indica ayera pa 2or di atardi cu e tempo tabata parcialmente nubla cu awaseronan breve pa loke tabata trata e paso di horcan Beryl den Caribe y lo a trece humedad den region local.
Pa loke tabata trata condicionnan maritimo y estado di lama, nan a bisa cu lama tabata bruto cu olanan di 5 pa 7 pia y cu nan por a yega te 9 of 10 pia.
Nan a adverti na esnan cu ta uso botonan chikito, na partinan oost te noordwest y den parti pa zuid pa bay landadonan y usuarionan di lama bay cu cautela ya cu e resake modera por a haci e parti aki un poco bruto.
Te ayera atardi Beryl tabata ubica na 375 KM zuidoost di Republica Dominicana y 895 KM di Jamaica.
Horcan Beryl a haci historia unda ayera a cambia pa categoria 5 unda a reporta varios morto den Caribe y un na costa di Venezuela, miles di hende tabata sin coriente y a bay drenta den refugionan temporal na St Vincent, Granadines y St Lucia. Ta spera cu e lo yega Mexico na final di e siman aki.
Carriacou na Grenada a haya basta dañonan segun e prome minister di e pais ey, Dickon Mitchell a sigura ayera, “Den mey ora Carriacou a ser destrosa.”
Den apenas dos dia e horcan aki a ser marca como un tormenta tropical, pero naturalesa un biaha mas a sorpresa mundo henter y den menos di 24 ora el a bira un horcan masha grandi mes cu ta menasa bida di hendenan y a laga dañonan importante na infrastructura.
Den relato aki, un potret ta di Baby Beach y e otro ta di Carriacou, na Grenada.
