Diferente dentista na Aruba a keha e ultimo dianan atrobe riba e maneho di AZV pa baha e prijsnan cu 21,2 porciento.
Ya for di november 2014 e seguro nacional ta negociando cu e asociacion di dentista riba e rebaho aki. Bon Dia Aruba a puntra vocero Solange Tchong dicon AZV kier cambia e recompensa pa e trabou di dentistanan na Aruba.
E ta splica cu AZV a haci un investigacion riba e costonan y na 2014 a yega na e conclusion cu e tarifanan ta halto. E resultadonan di e investigacion haci pa un experto externo, nan a discuti despues cu e asociacion di dentista, ADS. For di november 2014 pa final di 2016 AZV ta den negociacion cu e asociacion, segun e vocero, ‘tumando den consideracion algun punto treci di nan banda’.
Den augustus aña pasa AZV a avisa nan pa medio di un carta cu e rebaho lo bay aden. Pero ADS na december a notifica cu ainda nan no ta di acuerdo. Asina AZV a bay den combersacion atrobe cu nan.
Bon Dia Aruba a puntra e ora si e seguro ya a introduci e rebaho. Segun vocero Tchong e intencion tabata pa introduci esaki na januari di e aña aki. Pero como cu e asociacion a notifica cu no ta di acuerdo, a wanta e introduccion di e maneho nobo un rato y warda riba e resultado di e combersacion.
Riba social media Hendrik Marsman, un dentista basta famoso pa su opinionnan, a expresa su malcontento atrobe y bisa cu el a dicidi di no traha mas cu AZV.
