AZV a cuminsa cu ongeveer 10 caso pa aña, esaki tabata un proyecto piloto, pero awendia ya e ta un tratamento cu ta wordo cubri door di AZV bou condicion cu mester pasa y cumpli cu e screening. Dus no ta mara direct na cantidad, nos ta wak actualmente ongeveer 80 caso pa aña.
Gastric Bypass Surgery ta un operacion recomenda na personanan cu tin un BMI mas halto cu 40 cu condicionnan manera diabetes tipo 2 y presion halto y cu riesgo halto cu por ta fatal. Tambe e personanan aki mester a purba baha peso na un manera serio na diferente manera manera prome caba.
Gastric bypass ta wordo cubri door di AZV ora e ta medicamente necesario pero e ta mara na un proceso di screening cual ta bay via nos cirujano dr. Alex Ponson. Hopi hende ta lubida cu gastric bypass no ta e operacion solamente pa haci e stoma mas chikito sino mas bien full un proceso for di preparacion prome cu e operacion, mester por mustra cu por baha cierto cantidad di kilo prome y mester por ta dispuesto pa haci e cambio di estilo di bida) y cuido y guia despues di operación (control, adaptacion di nutrición, etc, etc). Pues den total e ta un trayecto di entre 1 pa 3 aña. Gastonan ta di e trayecto di preparación te cu despues di operación. AZV ta cubri e operacion pero tambe e cuido despues cu excepcion di cirugia estetico (cirugía pa haci curpa bunita cual ta algo cu e asegurado mester tene cuenta cu esey, tin hopi cuero ta keda over despues paso ta cuminsa baha peso masha lihe mes).
Come balansa y varia
Dietistanan generalmente no ta recomenda e tipo di operacion aki pa motibo di e manera lihe cu un persona ta baha peso cu por causa diferente complicacion. E stoma por wordo ahusta di mas, cu un persona no por come casi nada y ta saca den caso cu e haci esaki, piedra por forma den galblaas entre otro. E ta manera kitando un riesgo di salud y dunando bo diferente otro riesgo y complicacion. Hopi probabel ta cu e peso cu un persona ta subi ta sosode den transcurso di hopi aña y no den un biaha, pues pakico opta pa bahe den un biaha. E manera di mas saludabel pa baha peso ta pa come saludabel. E miho recomendacion ta pa come un dieta balansa y varia.
