AZV ta habri pa sigui negocia cu HAVA; Desapunto cu actitud di dokternan di cas

“Organo Ehecutivo di AZV ta lamenta e ultimatum di dokternan di caso,” ta e reaccion di Solange Tchong, vocero di AZV. “Pero nos ta mas cu dispuesto pa sigui delibera.”

AZV ta considera cu e reaccion di HAVA pa menasa di reduci servicio na clientenan di AZV pa motibo cu a corta den nan gasto hopi drastico, pasobra e man di AZV ta practicamente mara.

“AZV a haya instruccion pa baha gasto cu 5 miyon florin pa luna. Hulanda a duna e instruccion aki, pa asina Aruba por ricibi sosten di likides. Pa por a ricibi e placa, Gobierno a acepta e condicion y AZV no por a haci nada cu corta mesora y yega na un reduccion total di 35 miyon pa 2020,” Tchong a ilustra.

Segun e vocero di AZV, tabatin hopi discusion cu tur e dunadonan di servicio, hasta for di momento cu Covid 19 a yega Aruba. “Nos a cuminza papia cu tur asociacion di dunado di servicio for di momento cu Aruba a bay den lockdown.” Motibo ta cu a realisa cu e pasonan lo tin efecto grandi pa e fondo di AZV. “Nos tabata sa cu mesora lo a mira un caida den entrada. Na 2014 a bin cu BAZV pa yuda e fondo, y ora cu economia a para, a perde e entrada ey. Mas ainda, tin hopi hende cu a perde trabou y no a contribui mas na AZV.” A presenta e situacion aki na tur dunado di servicio medico. “Pero un biaha mas, no ta AZV kier haci fastioso. E ta importante pa realisa cu si AZV no cumpli cu condicionnan di Hulanda, Aruba lo no a haya ni tranche uno ni dos, y si kier di tres, nos mester baha gasto.”

Retroactivo

E sorpresa desagradabel pa HAVA tabata cu a corta gasto den forma retroactivo. “E porcentahe ta 5.5 porciento. Pero mester wak e reduccion riba henter un aña.” Tchong ta enfatisa cu Covid a para economia di Aruba na Maart y mester papia di henter un aña cu mester tuma paso pa baha gasto. Nos a splica e asociacionnan detayadamente kico ta e motibo cu a yega na e paso aki. Nos ta compronde cu nan ta protesta. E ta duro berdad. Pero AZV no tin espacio. Mester corta 35 miyon.” No tin otro opcion pa awor, segun Tchong.

AZV no sa di e varios alternativanan cu HAVA a presenta. Ta familiar cu uno, cu ta e aporte propio ora cu clientenan bay sala di emergencia na hospital. “Nos ta habri pa esey. Pero HAVA mester realisa cu no ta nan so ta afecta. Tur dunado di cuido ta afecta. E ciudadano ta afecta pa e crisis di Covid.”

Sra. Tchong tambe a reconoce cu e condicion di Hulanda pa corta gasto memey di un crisis no ta ideal. Pasobra normalmente no por corta gasto medico memey di un crisis di salud mundial. “Si wak rond Aruba, ainda e pandemia ta fuerte. Latino America, Colombia ainda ta cera, Merca ainda ta luchando. Hopi ciudad Europeo ta confrontando casonan nobo. Pero, unabes cu Gobierno a acepta e condicionnan pa ricibi ayudo financiero, no a keda otro opcion. “Nos kier pa HAVA compronde e posicion cu AZV a haya su mes aden.” Tchong a bisa cu ta dispuesto pa papia di e reduccion di 11 porciento cu ta refleha 5.5 porciento pa henter 2020, pero e detayenan lo mester ta discuti durante negociacion.

Aporte propio
Organo Ehecutivo for di momento cu Covid 19 a yega Aruba a tuma pasonan pa contraresta e efectonan financiero di e crisis economico. Asina a bin cu e modelo di 5 paso, cu ta inclui e posibilidad pa introduci aporte propio.

“E momento ey caba a cuminza pensa diferente scenario unda por adapta of haci cambio unda ta bira mas eficiente of por yuda baha gasto. Pero a pensa tambe cua ta e instrumentonan cu por uza. E tempo ey a delinea diferente scenario, Y mescos cu den pasado a bin e idea di aporte propio. Dus esey tabata los di e condicion di Hulanda. Pues a pensa caba con pa hisa eficiencia y cu hende ta haci uzo di AZV di un forma mas consciente. Si mester paga aporte propio, un hende ta mas cauteloso ora di uza servicio medico. Un hende cu cuida su mes na cas pa un verkoud no mester bay dokter.” Ya tabata riba e trayecto ey, ora cu a bin e condicionnan di Hulanda pa baha 35 miyon for di e presupuesto pa fin di 2020.

Esey a haci cu en bez di caba e trayecto den deliberacion cu dunadonan di cuido, mester a tuma paso de inmediato. “E ordo a drenta 18 di Mei pa corta mesora. Pa fin di Mei mester a corta 5 miyon caba cu a duna hopi presion y trabou, y nos no tabatin ningun otro opcion cu no tabata introduci tur e pasonan cu tabatin riba mesa. Y un di nan sigur ta e aporte propio. Pero pa esey nos mester di e ayudo di Parlamento di Aruba, pa por pasa e cambionan den ley. Eseynan ta accionnan stipula den e ley di AZV y esey ta unda nos ta awor aki.”

AZV tin tur comprension pa e situacion dificil cu tur hende ta aden awor aki, pero ta lamenta e tono di HAVA. “Nos no ta compronde pasobra tur otro asociacion a laga nos sa cu nan tin comprension pa e situacion, no obstante con duro e ta . HAVA ta bisa di kier ta solidario y ta spera cu esey berdad ta e caso pa asina por yega na otro prome cu Dialuna.”

Internamente, e organisacion mes a corta den e gasto di salarial cu 12.5 porciento.

Modelo di instrumentonan

A yega na un asina yama ‘AZV 5 wave model’, esta un pakete di diferente instrumento cu ta wordo introduci inmediatamente pa asina cumpli cu e peticion. Ora a analisa tur e diferente instrumentonan, a dicidi cu e instrumentonan mester cumpli cu 3 criteria yama e “PID”, esta e instrumento mester ta Practico (mester por wordo aplica facil, lihe y sin excepcion), mester tin un Impacto (un impacto / influencia directo riba e gastonan y consumo di cuido medico) y mester ta Directo (esta cu por wordo ehecuta di biaha dentro di algun siman).

Wave 1. Instrumento di uitstel, aplazamiento di pago. AZV a combersa cu e Asociacion di Banconan di Aruba. Ta duna cada dunado di cuido e oportunidad pa haci uzo di aplazamiento di pagonan. Cu esaki no ta directamente corta gastonan sin embargo ta crea e espacio di likides.

Wave 2. Bek na e raiz di AZV. Bay “back to basics” manteniendo tratamento y cuido medico. Akinan AZV lo limita, cambia of elimina tur cosnan cu AZV tabata duna extra y cu no ta hancra den Ley AZV. Lo percura pa keda cubri tratamentonan medico den exterior, pero lo elimina e aporte financiero di AZV (aporte pa cuminda y awa) di e acompañante social. Ta baha e aporte financiero di e pashent na 50% y ta introduci un aporte propio di 300 florin pa e ticket di e acompañante.

Wave 3. Pakete di AZV. Ta adapta of limita e pakete (cobertura) di AZV. Akinan AZV no por actua su so. Gobierno di Aruba lo mester haci e adaptacionnan necesario di e Ley AZV. Anticipando riba e cambionan den e Ley AZV, esaki lo nifica introduccion di aporte propio.

Wave 4. Temporizacion di e cuido. Aki ta unda lo reevalua cua tratamentonan di pashentnan tin mester di continua directamente y cua por warda (y wordo yuda otro momento). Ta warda cu algun expansion (ampliacion) di cuido medico.

Wave 5. Tarifa y presupuesto di dunadonan di cuido. Akinan ta aplica un cambio den e tarifanan di e dunadonan di cuido aplicando entre otro e 5.5% di corte den tarifa.

Calendario di instrumentonan

Algun di e instrumentonan aki ta cuminsa wordo introduci desde 1 di juni 2020 pa asina cumpli cu e instruccion di baha e gastonan di AZV (cuido) cu 5 miyon florin pa luna. AZV ta consciente cu e decisionnan tuma ta dificil. Sin embargo no tin otro opcion cu cumpli cu e instruccion di CFT y Rijks Minister Raad.