Recientemente AZV a tuma nota di e articulo den cual Bon Dia Aruba e entrevista miembronan di Lever Stichting Aruba tocante e retonan pa personanan cu malesanan di higra na Aruba. AZV ta aclaria su postura tocante transplante di higra.

Na prome luga, ta bon pa informa comunidad henter cu AZV semper ta apoya e fundacionnan cu ta traha riba e tereno di conscientisacion y informacion di comunidad di Aruba riba e tereno di prevencion of cuido medico. Na di dos luga, AZV ta haya cu e ta bon si pa duna un aclaracion riba dicho articulo.

Kico ta AZV?
Organo Ehecutivo AZV ta manera cu e nomber mes ta bisa…e instancia cu ta encarga cu ehecucion di e ley AZV. E ley AZV ta e seguro medico general di Aruba. Segun Ley di AZV ta exclui di e cobertura tur tipo di transplante, cu excepcion di tres tipo di transplante di organo cu si ta wordo cubri: esta e transplante di cornea (lens di wowo), e transplante di riñon y e transplante di beenmerg (medula oseo). Pa cada un tin cierto criteria y liñanan medico cu mester sigui.

Historia
Loke ta importante pa compronde, ta cu e tempo aya, esta na aña 1992 ora a skirbi e Ley di AZV, e circunstancianan tabata otro. Hopi tipo di transplante di organo no tabata proba (medicamente) suficientemente, of chens pa un transplantacion exitoso no tabata hopi halto, of no tabatin na Aruba e infrastructura pa percura pa e cuido medico integral pa e pashent despues di e operacion. A opta e ora ey pa exclui tur tipo di transplante, cu excepcion di esunnan cu si tabata proba caba, of cu den circulo medico tabata tin consenso cu e chens di exito tabata riba promedio. Cu otro palabra, cu e pashent su chens di sobrevivi tabata halto (den caso di transplante di riñon of beenmerg).

A dura hopi aña pa introduccion di AZV, cual a sosode na 2001. Despues di introduccion di AZV, ora keda monitor y evalua e desaroyonan riba tereno di cuido medico, den cual den e circulo medico den exterior cierto transplante si a bira algo mas comun y proba medicamente, lamentablemente a haya sa cu Aruba ainda no tabata tin tur e infrastructura of tipo di cuido necesario pa cierto tratamento, incluyendo e cuido pa un transplante di higra.

E ley
 Un factor hopi importante ta e ley di AZV mes. Si acaso bin na e conclusion cu tin consenso medico riba e efectividad y e chens di exito mes, ainda lo mester bin un cambio di ley pa ofrece cobertura. Un cambio di ley ta un procedura extenso cu no por realisa di un dia pa otro. Un cambio di ley ta encera tambe un evaluacion di ley integro cu ta nifica, cu mester bay tuma decisionnan kico si y kico no kier hinca bou di e cobertura di AZV. Un topico cual AZV a menciona cu ta uno hopi sensitivo, pa cual mester tin discusionnan extenso cu por ehempel esunnan cu ta skirbi ley y Gobierno di Aruba, y cu lo mester tin suficiente apoyo politico. Ta decisionnan cu lo mester wordo tuma.

Situacion actual
 Te cu awe AZV ta monitor y sigui tur desaroyonan mundial. Asina tin paisnan unda, por ehempel, transplante di curason ta tumando luga. Esaki no ta nifica cu Aruba automaticamente lo haya esaki bou AZV, pasobra (ainda) esakinan ta exclui for di nos ley, y pa por cambia e ley mester evalua preguntanan manera, kico tur kier amplia bou di AZV, kico tur tin mester pa e cuido di e pashent despues cu e yega Aruba, con largo e tratamento lo keda wordo duna (pa bida largo?) y Aruba por duna e cuido aki?

Ta berdad cu awor, despues di hopi aña, tin diferente desaroyo medico positivo tumando luga na Aruba, entre otro pa pashentnan cu malesa di higra, pero cambio di ley ta un proceso lamentablemente cu no ta tuma luga di un dia pa otro.