Despues cu Bon Dia Aruba a publica e articulo di Leoni Brokke ‘Cana pa recuperacion’, nos a tuma contacto cu AZV pa un reaccion y cu algun pregunta.

AZV ta duna di conoce prome cu tur cos, cu generalmente nan no ta sali cu informacion di pashent den prensa pa motibo cu como organisacion nan ta mara na secresia medico. Ta solamente den casonan hopi limita y excepcional, unda e pashent mes y of su famia ta sali den medionan di comunicacion cu nan banda di medaya, y asina nan mes ta renuncia nan privacidad, AZV tambe ta duna informacion tocante e caso.

Informacion incorecto
Segun vocero di AZV Solange Tchong, ta splica Bon Dia, contrario na loke ta wordo indica den di e articulo, esta cu AZV no ta cubri gastonan ocasiona door di accidente, ta importante pa splica cu esaki no ta corecto. Segun AZV, ta cubri e gastonan medico na Aruba. Sinembargo e mesun ley di AZV ta stipula cu AZV tin e obligacion di recupera (cobra) e gastonan bek cu ta atribui na un tercer partido cu a ocasiona e accidente. Den caso di Leoni Brokke, AZV a paga entre otro hospital tur su gastonan; hospital no por a manda un cuenta pa e famia. Awor AZV ta den e proceso pa  por recupera e gastonan aki di e tercer partido, for di cual specificamente ta recupera e gastonan bek for di e seguro di e partido cu a ocasiona e accident.

Segun AZV, ta cubri tur gasto medico, sea cu e lesion ta severo of no, con tal cu el a sosode na Aruba, cu e cuido ta indica medicamente y cu e cuido ta ‘comun y coriente’ dentro di e ‘beroepsgroep’. Pa terapia, e mesun criterionan ta valido, esta medicamente indica, duna na Aruba y ‘comun y coriente’. Sra. Tchong ta splica cu AZV a wordo acerca den luna di november 2016 cu e pregunta si por yuda cubri e gastonan medico di Leoni Brokke na Colombia. E momento ey, AZV ta wordo informa cu Leoni Brokke a haya un accident den luna di september y cu e famia riba su propio gastonan a traslada Leoni Brokke pa Colombia. Segun AZV Mesora nan a informa e famia cu esaki no ta posibel paso ya caba a bay riba nan mes. E ley di AZV ta bisa cu por cubri gastonan pa tratamento medico den exterior ora tin un aprobacion adelanta di AZV.

Cuido medico na Aruba
Den un intento pa busca un solucion, AZV a dicidi di acerca e dokternan local cu tabata tratando e pashent pa haya un opinion di nan tocante e condicion di sr. Brokke. A resulta cu ora pashent tabata na Aruba no tabata tin un indicacion medico pa manda e pashent exterior pa motibo cu e cuido y tratamento por wordo duna na Aruba. E ley di AZV ta stipula cu tur cuido cu por wordo duna na Aruba, lo mester wordo duna na Aruba. Pa haya cuido medico den exterior, mester tin un peticion na AZV, establece cu e cuido ta medicamente necesario y cu e cuido no por wordo duna na Aruba. Despues di a ricibi e opinion di e dokternan local, AZV a busca mas aya. Cu e pensamento cu lo por wak con pa yuda e famia aki, a bay check con ta para cu e gastonan te cu e momento ey y e seguro di e ‘aansprakelijke derde’ esta e seguro di e tercer partido. E pensamento tabata cu kisas e gastonan di hospital lo por ta abou cu e famia lo por haya placa di e seguro pa cubri e cuenta di Colombia. Saliendo for di e punto di bista ey, AZV a pidi Dokter Horacio Oduber Hospitaal (HOH) un overzicht di e gastonan. Sin embargo, esaki tampoco no por a bira e solucion ya cu e gastonan di ingreso y tratamento den HOH tabata hopi halto cu esaki lo surpasa e suma pa cual ta sigura, esta e suma sigura via e seguro di auto di tercer partido. E ta nifica cu practicamente no ta resta nada pa e famia haya di e seguro di e tercer partido ya cu AZV tampoco lo por keda sin recupera su gastonan bek. Apart di esey, e proceso di ‘schadeafwikkeling’ ta uno unda tur gastonan relata cu e accidente ta wordo cubri door di e ‘verzekerde som’ cual ta nifica cu e 150 mil florin mester wordo reparti bou di tur esnan cu a sufri daño durante di e accidente. Na e momento cu e gastonan surpasa e ‘verzekerde som’ di 150 mil, lo aplica un ‘pro rata factor’ pa asina calcula con ta parti e 150 mil. Esaki ta e motibo pa cual e famia lo no haya e placa completo. E ta un formula cu por cierto ta wordo uza pa hopi compania di seguro.

Caminda legal pa cana
Segun AZV, nan a invita e famia pa papia y informa nan un biaha mas cu no por cubri e gastonan di Colombia pero cu manera sr. Brokke yega Aruba, e lo cay bou di e Fondo di AZV bek. Segun AZV, e famia a indica cu tin sospecho di negligencia medico. A base di esey, AZV a duna e famia tur informacion di e opcionnan legal cu tin. Por ehempel di entrega reclamo na Inspectie Volksgezondheid Aruba, e Medisch Tuchtcollege y of Gerecht. Pa facilita e famia, AZV a ofrece cu lo yuda nan door di traha e carta di keho oficial pa Medisch Tuchtcollege. Un concepto di e carta aki a wordo manda pa e mama di Leoni Brokke riba 15 di februari 2017. Despues cu a manda esaki, segun AZV, nan no a ricibi un reaccion.

AZV ta splica cu nan ta lamenta cu dentro di e ley di AZV no tin otro manera awor pa yuda sr. Brokke. E mesun ley AZV ta stipula cu una bes bo sali pa exterior riba bo mes, e ta keda bo propio gastonan. Toch AZV ta convenci cu a purba evalua tur opcion. Tur gastonan na Aruba (incluyendo dianan interna, test di laboratorio, radiologia, specialista, etc., etc.) a wordo cubri door di AZV.

Pa culmina nan ta bisa cu AZV no ta duna detaye di e gastonan na prensa pero e famia directo por pidi un specificacion di e gastonan si nan ta desea. E mensahe mas importante di AZV pa nos comunidad ta pa evalua bon prome cu biaha pa exterior riba bo mes. Esaki ta duna speransa berdad, pero ta trece gastonan medico halto cu ne cu hopi biaha bo no ta spera.