AZV ta laga sa cu semper nan fondonan ta bay ta limita anto cu tin motibo pakico esunnan cu a traha e ley di AZV a structura esaki cu e condicionnan stipula.
“Na momento cu no tin scarsedad, e ora nos ta biba den cielo,” director di AZV Anco Ringeling ta bisa nos. Sr. Ringeling ta bisa cu no ta e caso cu nan no tin suficiente fondo. E ta subraya si cu semper e fondonan ta bay ta limita. E ta conta nos cu unabes cu tin scarsedad, mester bay wak bon con bo ta bay gasta e placa. E director ta kere cu como un aseguro pa henter nos poblacion, nan mester wak pa nan por gasta e placa na tratamentonan cu a wordo comproba cu tin efecto. Anto si ta trata di tratamentonan experimental cu ta den proceso ainda, e ora segun AZV mester warda te ora cu yega na conclusion cu e tratamento tin suficiente efecto.
Sr. Ringeling ta bisa: “Mi ta compronde pa por ehempel mayornan of esun cu tin e malesa excepcional ey, cu esey ta un contesta kisas no mucho satisfactorio. Pero si bo wak cu nos ta un seguro cu ta cubri henter nos poblacion, bo gasta algo na X, bo no lo por gast’e mas na Y. Den e escogencia ey, mi ta bisa bo mester scoge pa esun di cual a wordo comproba cu tin su efectonan.”
E director di AZV ta laga sa cu unabes e wordo demostra cientificamente, cu un consenso di e grupo di profesional concerni, si e keda demostra cu ta efectivo e ta bira comun y coriente. Sr. Ringeling ta sigui bisa nos cu mirando cu bo lo bay tin un cierto cantidad di fondo pa por cubri tur e gastonan cu tin di haber cu cuido medico, e ora lo mester dedica e fondonan disponibel na e tratamentonan cu tin mas tanto efecto, cual ta e tratamentonan comun y coriente.
Ley
Segun sr. Ringeling, ta bon pa splica cu esunnan cu a traha e ley di AZV e tempo ey, gobierno y parlamento, a haci mescos cu tur tipo di leynan cu ta regla un sistema colectivo manera nos tin. “Bo no ta bay wak esey den un aseguro priva. Pero den un aseguro colectivo, na Hulanda, Canada, UK, tur bo ta wak e tipo di condicionnan ey cu mester ta un tratamento comun y coriente.” E director ta sigui bisa cu si e condicion ey no wordo stipula, cualkier tratamento por cay bao di e cubrimento di AZV.
