Entrante 1 di januari 2016 aseguradonan di AZV por paga e diferencia di prijs entre un ‘specialité’, esta un remedi di marca, y e remedi generico cu AZV ta cubri. Asina bo por haya bo producto di marca na bo botica. Esaki e compania di seguro ta informa. Antes bo mester a paga 100% di e prijs pero esaki ta cambia den 2016. “Prome cu ta dicidi di haci uzo di e posibilidad nos ta conseha tur hende pa informa bo mes bon tocante remedi generico”, AZV ta bisa.
Aki bou por lesa un splicacion di AZV riba e topico aki. Por wak un video tambe.
Splicacion
Kico ta un remedi generico?
Un remedi generico ta e ekivalente terapeutico di un producto farmaceutico original di cual su patente a caduca. E ta contene mesun ingrediente activo cu e original y p’esey e ta ekivalente y intercambiabel cu e specialité. Un remedi generico ta wordo poni riba mercado teniendo cuenta cu e leynan internacional di patente. Na Europa cada bes mas e dokternan ta prescribi remedi generico, como alternativa eficaz di remidinan di marca mas caro.
Kico ta e diferencia entre un remedi generico y un specialité?
No tin ningun diferencia terapeutico entre un remedi generico y un specialité (remedi di marca). Tin un diferencia den prijs, si. Un remedi generico ta 20 te 80% mas barata cu e producto original. Remedi generico por contene otro ingrediente inactivo (por ehempel, colorante, zetmeel, sacharose etc.) cu no tin efecto terapeutico.
Ken ta controla e calidad, seguridad y efeciencia di un remedi generico?
Igual cu cerca otro remedi, e calidad, seguridad y effectividad di un remedi generico ta garantiza. Na Aruba nos ta wak kico e autoridad competente na Union Europeo of na Merca (Food and Drug Administration) ta dicidi. Pa haya autorizacion pa subi mercado e producto mester ta bio-ekivalente na e producto di marca. Pa remedi generico ta conta e mesun procedura cu pa specialité. E proceso ta tuma 1 pa 3 aña prome cu un producto por wordo bendi.
Remedi generico ta mas barata di berdad?
Si, tin un diferencia di prijs significante. Remedi generico ta promedio 20 te 80% mas barata cu remedi di marca.
Con e pashent y salubridad en general ta beneficia di remedi generico?
E uzo di remedi generico ta inmediatamente visibel den e costonan den comparacion cu e remedinan di marca. Asina por spaar placa den salubridad y uz’e pa otro tipo di tratamento nobo y caro pa cual no tin un alternativa mas economico ainda.
Unda mi por haya mas informacion tocante remedi generico?
Pa haya mas informacion specifico of otro pregunta tocante bo salud nos ta sonseha pa sonsulta bo dokter di cas of e specialista cu ta trata bo of pa bay bo botica pa puntra e farmaceutico. Tambe tin informacion riba e website azv.aw.
Si mi kier toch un remedi di marca, mi por paga e diferencia?
Si, for di dia 1 di januari 2016 e ta posibel pa paga e diferencia den prijs entre un producto generico y un producto di marca na bo botica y asina consegui e specialité. Prome tawata asina cu ora un persona kier e specialité e mester a paga e producto 100%. Awor ta djies e diferencia den prijs cu e producto genérico.
