–

Director di AZV Anco Ringeling ta conta nos cu nan ta bao impresion cu gran parti di poblacion no ta compronde bon con e seguro nacional ta yega na cierto decision ora ta trata casonan excepcional manera esun di Baby Lunah of famia Ling.

Bon Dia Aruba a acera AZV pa un reaccion riba kico ta e rekisitonan of indicacionnan cu mester cumpli cu ne den ley pa wordo sigura y con esaki ta realmente hinca den otro. E director a duna nos e siguiente splicacion y subraya cu a pesar cu no ta custumber di AZV pa menciona nomber, unabes cu e pashent mes ta bin dilanti den media, e ta kere ta bon pa menciona como ehempel pa e bira mas concreto.

‘Hende friu sin compasion’
AZV ta referi akinan na casonan por ehempel di baby Lunah y sra. Ling tambe unda cu ta mira reaccionnan di publico cu ta pone nan pensa cu kisas nan no ta splica bon con nan ta yega na cierto conclusion. “Anto esaki ta crea e impresion cu kisas nos ta un set di hende friu cu no tin compasion den locual e famia ta pasa aden. Esaki no ta e caso pasobra nos tin compasion naturalmente pero di otro banda nos ta ehecutando un ley. No ta asina cu e directiva ta dicidi ken tin derecho ariba kico.”

No ta cubri transplante
Parlamento y gobierno, kende a traha e ley di AZV, a stipula specificamente kico ta e derecho di un asegurado cu ta cay bao di e seguro nacional. Den esey segun e director, tin cosnan specificamente cu a wordo exclui; por ehempel transplante di curason.
Maske cu dokter ta bisa cu bo mester un transplante di curason, AZV no por cubri esaki pasobra e no ta para den e ley cu mester cumpli cu ne. “Esunnan cu a traha e ley no a trah’e por nada. Pasobra ora cu a traha e ley, nan a inventarisa prome kico ta e cuido cu nos por maneha akinan na Aruba. Unabes bo haya transplantacion di curason, pulmon of higra, e ora ey e cuido despues di e operacion aki ta regularmente. Mester keda cu un specialista cu sa di transplante di curason cual nos no tin na Aruba. Ta p’esey el a wordo exclui tambe”

Cuido ‘comun y coriente’
Como tin diferente tipo di specialista, segun sr. Ringeling, den e ley tin formula cu no ta asina cu un asegurado tin derecho na cualkier tratamento di un specialista. Esaki mester ta ‘comun y coriente’ den e profesion di e specialismo concerni.
Pero con ta haya sa si pashent mester un cuido comun y coriente? “Pa un pais relativamente chikito manera Aruba, nos no tin e mecanismo manera otro paisnan grandi pa por dicidi y evalua si algo ta comun y coriente.”
E ta sigui bisa cu: “Na paisnan mas grandi manera Hulanda tin universidadnan medico cu ta haci investigacion cientifico. Nan tin asociacionnan di e diferente profesional y specialismo cu ta saca guidelines. Tur e recursonan aki nos no tin, pues AZV ta orienta su mes riba Hulanda.”

Opinion medico
Na Hulanda tin cierto mecanismo y un sistema parecido na AZV; pues e gobierno eynan tin cu indica y evalua kico precies ta e derecho di e asegurado.
“Na Hulanda tambe bo ta wak discusionnan si e por ta cierto remedinan caro, si nan tin derecho na cierto tratamento of remedi. Den casonan manera por ehempel baby Lunah y sra. Ling, nos ta pidi un opinion medico di instancianan cu tin autoridad riba e tereno cu ta toca e malesa concerni. ”
E director ta sigui splica cu hopi bes e tratamento cu sea e mayor of doño di curpa mes ta desea, e opinion di autoridadnan y experto ta bisa cu no ta esun indica. Hasta na Hulanda nan a bisa cu nan no ta kere cu lo mester manda baby Lunah pa nan pasobra eynan nan no ta bay haci e tratamento cu e mayornan ta desea. “Esey ta un opinion cu ta bisa aparentemente e tratamento cu e famia ta desea no ta comun y coriente na Hulanda. Si tin un luga na Merca cu si por haci e por ehempel, ainda e no ta cuadra cu e ley cu ta bisa cu e mester ta tratamento comun y coriente.”
E director ta conclui cu unabes cu a base di e opinion di experto nan yega na conclusion cu e no ta comun y coriente, nan djis no por cubri e. “Nos tin cu ehecuta un ley anto nos mester bay segun e ley anto e ley ta trece cierto limitacion cu ne.”