Ayera AZV a organisa un conferencia di prensa pa duna un splicacion poco mas amplio riba e tipo di casonan manera esun di Kyrenne Croes. Den pasado tabata tin varios otro caso caminda cu AZV mester a yega na e conclusion cu e tratamento desea no ta wordo cubri.

“No tin motibo pa duda riba e experticio den general di nos dokter y specialistanan”,esaki ta locual director di AZV Anko Ringeling a expresa. Si un pashent no tin confiansa den su dokternan, esey riba su mes nunca no por ta un motibo pa manda e pashent exterior segun AZV.

“No ta asina cu demasiado biaha tin keho tocante nos mediconan. Mayoria di e casonan, bo no ta tende nada. Mayoria di contacto cu tin entre un pashent cu dokter di cas/specialista ta bay sin problema. E casonan cu ta bini den noticia ta excepcionnan”, el a sigui comenta. Den e caso di Kyrenne Croes por ehempel, AZV y specialista local cu tabata tin parti di tratamento di Kyrenne, a ofrece e famia pa wak si por haci un acuerdo cu SABA pa regla un setting cu Kyrenne por haya e terapia mas intensivo, pero famia a nenga pasobra no tin confiansa den SABA tampoco.

“No ta asina cu si AZV no ta cubri algo nos ta laga bo na bo cuenta. Nos a purba toch si tin posibilidad por ehempel SABA pa yuda. Nos ta calcula cu tin 10 pa 15 pashent cu ta den estado similar na Kyrenne cu ta den SABA.”

Manera ta conoci, entre otro den e pakete basta amplio cu AZV ta cubriendo; dokter di cas, fysioterapista, specialista etc. Un di e cosnan para den ley – specialmente pa e cuido di specialista ta cu AZV ta cubri e servicionan/tratamento di e specialista manera ta usual den e profesion/disciplina concerni. Esunnan cu a traha e ley a hinca esaki den otro pa protege e pashent segun sr. Ringeling. “Si un procedura no ta usual ainda cerca e specialistanan, bo ta core cierto riesgo. Den paisnan mas grandi cu nos tin asociacionnan di profesional, tin hospitalnan academico cu ta haci research, cual tur ta recursonan cu nos no tin. Y den e paisnan ey na dado momento nan tin e formula pa bisa cu tal procedura ta responsabel , anto e ta wordo acepta por medio di e disciplina concerni”, e director a splica.

Aceptabel pues den e sentido cu e ta suficiente safe pa e pashentnan, cu efectonan no desea ta pasa, pues e tratamento ta wordo acepta y ta bira un tratamento cubri pa e seguro. “E pregunta cu si un cos ta usual den e disciplina, no ta mesun relevante den tur pais. E ta relevante den paisnan cu tin un sistema parecido na esun di nos.”

Sistema colectivo
Na AZV locual ta conta pa un ta conta pa tur, anto e director ta bisa cu na otro paisnan manera Merca, henter e sistema ta otro pasobra no tin sistema colectivo. Un sistema manera esaki ta opera na Canada y United Kingdom por ehempel unda tur tin manera pa dicidi si un tratamento ta cay pa un seguro colectivo. Mirando cu nos no tin e recursonan cu paisnan mas grandi tin, nos ta orienta nos mes mas tanto riba Hulanda segun sr. Ringeling. Esaki pasobra eynan tin diferente mecanismo cu ta dicidi si un tratamento specialmente uno nobo ta wordo cubri por medio di nan sistema colectivo. “Si un procedura ta comun y coriente na Hulanda cubri por medio di nan sistema colectivo, nos ta hacie akinan. Esey ta un criteria cu ley ta bisa nos mantene ora nos mester contesta e pregunta si un cierto tratamento ta wordo cubri door di Azv.”

Accidente di trafico
Otro pregunta cu hopi bes ta wordo haci, specialmente rond di e discusion di Kyrenne Croes su caso por ehempel, ta si AZV ta cubri ora cu un persona mester tratamento medico pasobra el a haya su mes den un accident di trafico. Ringeling: “Nos ta cubrie, pero nos ta cobra bek te asina leu cu for di e seguro di e pashent of di e tercer parti cu a ocasiona e accidente. Pues e no ta asina cu automaticamente AZV no ta cubri si ta un accidente di trafico. Nos ta cubri tur tratamento medico cu ta necesario, y despues nos ta wak con nos ta cobra bek parti cual hopi bes no ta completamente tampoco.”

Accident durante vakantie
Algo cu ta sosode regularmente segun sr. Ringeling y cu nan a yega di informa den pasado tambe riba dje, ora un persona haya un accident den exterior y mester ayudo. “Den un caso cu un persona a bay riba su mes, e ley di AZV ta bisa cu AZV no ta cubri esey. E seguro ta cubri solamente tratamento den exterior si tin aprobacion adelanta di AZV”, sr, Ringeling a bisa.