AZV no ta cubri transplante di higra, maske e cirugia ta 90% exitoso

Bon Dia Aruba a papia cu representantenan di Lever Stichting Aruba, kende a conta tocante e retonan pa cu malesa di higra na Aruba.

Lever Stichting Aruba ta un organisacion sin fin di lucro, cu a cuminsa 12 di januari 2018. E fundacion ta un iniciativa di su presidente, Mario Arends kende a ricibi un transplante di higra na aña 2016, y kier comparti su experiencianan pa asina yuda preveni cu ciudadanonan na Aruba mester pasa door di e mesun situacion cu Arends a pasa aden.

Ta importante destaca cu e higra ta e di dos organo mas importante di e curpa, ta necesario cu hende mester purba di mantene un bida saludabel, pa motibo cu ta necesario pa biba y ta e laboratorio di e organismo, ora e ta procesa y forma un serie di nutriente.

Durante un entrevista cu Bon Dia Aruba a tene cu Catalina Arends, secretaria di Lever Stichting Aruba, el a splica cu un di e obhetivo principal di e fundacion ta pa conscientisa e pueblo di Aruba riba malesanan di higra, di igual forma preveni cu mas hende lo por sufri door di e malesanan aki.

El a duna di conoce cu e fundacion ta encarga di guia y yuda e pashentnan cu mester haci transplante di higra. Esaki ta un decision cu ta afecta e pashent y henter famia. Un problema masha grandi ta cu na Aruba no ta posibel pa haci transplante di higra, y di igual forma e seguro AZV no ta cubri e cirugia di transplante. Esey tambe ta un di e propositonan cu nan kier logra.

“Un persona cu ta afecta, cu un malesa di higra, mester bay Hulanda y nan mes mester cubri tur e gastonan, full e proceso di cirugia y recuperacion”, Arends a informa.

Catalina a señala cu na Aruba ta existi hopi caso di personanan cu ta afecta cu problema di higra, parti di e hunta directiva di e fundacion ta conta cu un dokter cu ta un specialista. El a splica cu e casonan ta hopi pa via di alcohol, pero tambe ta existi casonan di personanan cu no ta bebe alcohol pero nan a haya malesa di higra. El a expresa cu e causa por ta algo hereditario of mal nutricion.

“E transplante di higra ta un operacion grandi, pero e ta un operacion cu nan a desaroya asina hopi riba dje, cu ta un operacion cu 90% di persona tin un chens di sobrevivi pa añanan, p’esey nos ta desea pa AZV cuminsa cubri e cirugia of e cuido despues di cirugia”, Arends a afirma.

El a sigura cu un persona cu nacionalidad Hulandes como un Arubiano cu a transplanta caba na Hulanda, e tin cu keda controla eynan, no por regresa Aruba. Cu excepcion di personanan cu tin e manera financiero pa cu nan propio placa cubri cada bes pa bula Hulanda, dos biaha pa aña, y asina cubri e gasto di pasashi, estadia y gastonan medico di control. P’esey ta existi hopi Arubianonan cu ta keda biba na Hulanda.

“Esaki ta algo cu ta causa shock pa e personanan, pa motibo cu nan no sa na unda mester cuminsa si nan no tin e recursonan. Esey ta pasa hopi, nan no sa kico pa haci of na unda nan mester bay, eynan Lever Stichting Aruba ta haci su trabou”, el a afirma.

E operacion di transplante di higra tin un costo di aproximadamente 100.000 euro. Door cu Arubianonan tin paspoort Hulandes e ora ey nan ta inscribi eynan y nan ta cera un seguro, y asina ta cubri e cirugia. “Esey ta un bendicion, pero pa e persona yega eynan, mester bay biba na Hulanda”, Arends a afirma.

Catalina Arends tambe a duna di conoce cu e fundacion ta den busca di boluntarionan pa motibo cu nan ta creciendo, y e trabou ta bira mas hopi pa cumpli y haci lo mas posibel pa yuda hende, conscientisa y preveni.

El a manifesta cu un hende cu ta saludabel hopi biaha no ta pensa riba su higra. Hende mester ta consciente di kico ta consumi, pa motibo cu higra no ta duna ni un sintoma te ora ta laat caba. Door di esey un di e sintoma mas popular ta cu e persona por bira geel, of e cuero ta bira geel, pasobra e higra no por procesa cierto toxico.

Pa finalisa, a comenta cu e aña aki nan tin planea pa haci diferente charla den diferente bario, pa sigui cu e conscientisacion, y e la bisa cu nan ta espera cu prome di fin di aña nan lo por logra esey.