AZV ta subraya cu nan ta cubri gastonan di pashent di accident cu mester bay den exterior, pero no pa un tempo largo.
E ley di AZV ta un seguro medico general cu ta cubri en principio tur momento como asegurado di AZV haya nan mes enfrenta cu un malesa. Segun vocero di AZV Solange Tchong, si bo bay bek na e esencia di e ley bo ta mira cu ta trata di malesanan cu ta bati na nos porta di sorpresa. Na momento cu ta papiando di un accident di auto, por bay wak si kico ta e origen; ken a causa e accident aki y si en berdad AZV ta esun responsabel pa cubri e gastonan aki.
Hopi biaha accident di auto por causa un parti di revalidacion. “Despues di un accident hopi biaha bo no ta keda e mesun persona cu bo tabata ta prome cu e accident. Mayoria di biaha bo ta bay rekeri di terapia intensivo y largo. Nos ta papia e ora ey di revalidacion.” Un parti di revalidacion segun sra. Tchong AZV ta cubri. Siguramente e parti di servicio y cuido duna den hospital mes.
AZV ta haci un distincion hopi grandi si ora ta papia di revalidacion largo y intensivo compara cu un periodo mas cortico. Pues loke bo ta haya ta cu e dunadonan di cuido trahando pa AZV ta evalua hopi critico y cauteloso na ki momento berdad nan mester duna revalidacion si of no. Pero tambe con intensivo y largo. “Na momento cu nos ta papia di un revalidacion practicamente unda e persona mester keda un pa dos aña of te hasta añanan largo den exterior prome cu bin bek Aruba, eynan AZV ta bisa no. Loke AZV si por cubri ta un parti di revalidacion pa un tempo corto pero intensivo. E ta depende di e situacion, por ehempel un periodo di tres of seis siman, of maximo tres te cu seis luna,” sra. Tchong ta splica.
No pa eternidad
E ta sigui bisa cu una bes bo ta papia di un revalidacion den exterior cu un periodo hopi mas largo, ya caba tanto AZV como e comision cu ta duna nan conseho pa casonan cu tin cu bay den exterior, lo bay evalua kico ta e miho recomendacion pa cu e pashent/asegurado e ora. Segun sra. Tchong, den mayoria caso nan lo recomenda pa su famia hunto cu e pashent evalua pa emigra den e pais afo. “Pasobra den e ley di AZV mes nunca tabata poni pa nos cubri revalidacion intenso y largo pa eternidad. Pasobra bo tin casonan unda berdad henter bo bida bo tin cu haya ayudo y cuido. Y eynan nos ta papiando di un otro situacion.”
Derecho pa recupera gasto
Si bo wak e ley, en principio pa loke ta trata accident AZV no ta cubri esaki pasobra e ta wordo causa entre partidonan cu generalmente tambe mester tin un seguro di auto pa cubri gasto di daño material y medico. Den e caso aki ta asina si cu AZV semper te aworaki a cubri accidentnan di auto incluso otro tipo di accident. Vocero Solange: “Pero ta asina si cu den propio ley di AZV tin derecho pa recupera e gastonan aki bek. Nos ta yama esey e verhaalrecht cu AZV tin.” E recuperacion di gasto ta wordo haci despues te na final di e trayectorio.
Colaboracion cu polis
AZV ta traha cu Cuerpo Policial Aruba den un tipo di colaboracion unda cu regularmente polis ta manda nan reportenan di accidentnan di auto. Den e reportenan aki nan ta haya informacion unda cu como AZV nan por en todo caso haci intento pa haya e placa bek pa loke ta trata e cuido medico. “En principio e ley di AZV tabata t’ey pa ora nos bira malo pero a haya algo inespera. Pero no un malesa causa door di un accident. E no ta kita afo si cu den e practica di tur dia – for di desde AZV a cuminsa na 2001 te cu awe – ainda toch AZV den mayoria caso ta cubri e gastonan aki hasta si ta trata cu pashent lo mester bay den exterior.”
Na otro paisnan manera Corsou y Hulanda tin un otro seguro cu ta cubri malesanan cronico, ayudo pa personanan incapacita unda tambe hende cu mester cuido henter nan bida. Na Aruba un seguro asina no ta existi. Asina e pashentnan ta depende di ayudo di fundacionnan of fondonan priva.
