Tanto Minister Presidente, Evelyn Wever-Croes como minister di Salubridad Publico, Dangui Oduber a referi cu no ta un ehercicio facil pa reduci e suma total di 35 miyon te fin di 2020 for di gastonan di AZV. Sin cu esaki afecta e servicio di cuido medico cu e organo di seguro general aki ta ofrece na comunidad.

Nan a logra palabra cu Hulanda –segun MinPres– cu no mester ta estrictamente tur luna 5 miyon. Pero si gobierno di Aruba mester prepara un plan di cortamento te fin di aña cu ta cubri 7 luna na 5 miyon. Nan a logra si cu Hulanda crea un diferencia riba gasto relaciona na Covid y no Covid. E diferencia aki ta importante, ya cu memey di un pandemia, dificilmente nan por reduci gasto riba casonan relaciona cu e virus aki.

Ya caba decision a wordo tuma den AZV pa corta gasto cu mester tin su efecto den fin di aña pa cumpli cu e reduccion di 35 miyon. Prome Minister ta haya cu si nos tin cu entrega 5 miyon pa garantisa e cuido en general na Aruba, e prijs aki no ta di e halto ey pa paga.

Nan a cuminsa corta prome riba gasto interno di salario y gasto operacional. Tambe nan a cuminsa corta riba cierto servicio cu a crea controversia den comunidad. Un di nan tin di haci cu e servicio di transporte pa esunnan cu mester dialisa.

Wever-Croes a bisa cu asegurado mester cubri e servicio aki, ya cu nan no por sigui paga e gasto di transporte aki. Pero el a splica cu tin excepcion cu nan ta sigui paga pa e transportacion, por ehempel si e pashent ta den rolstoel of riba cama. E mandatario a bisa cu esnan cu realmente no por paga p’e, gobierno ta bay paga. A pesar cu nan no tin placa. Nan lo busca e forma pa e pashent mas vulnerabel cu no por paga por yega na e luga pa haci dialisis pa nan no perde cuido.

Pa reduci e gasto di transporte, nan ta pidi e famia pa haci un extra esfuerso pa hiba nan ser keri pa tuma e dialisis. AZV mester a kies entre paga pa e dialisis di e pashent of paga pa transporte di esun cu bay dialisa. “Tanto bal bo ta duna transporte y bo no tin placa pa duna dialisis”, el a bisa.

Minister Oduber a indica cu 133 pashent di dialisis ta haciendo uzo di e servicio di transporte. Un grupo di 33 pashent ta esun mas vulnerabel. Nan mester di ayudo pa cubri nan transportacion y evita cu nan no por haya e tratamento aki. Gobierno a pidi AZV pa continua cu e transporte pasobra tin pashent custumbra cune. Mientras cu nan ta evalua kende por paga y ken no por paga pe.

Esnan cu no por paga p’e, gobierno lo asumi e gasto aki. Ya cu entre nan tin pashent cu ta biba di bijstand y onderstand. Tambe nan ta pensando riba pensionado cu tin un entrada so y nan ta haciendo uzo di e servicio di transporte pa bay dialisa. “Sinceramente e discusion aki ta duel mi hopi. Pasobra mi no a desea nunca pa nos mishi na loke ta trata cuido,” Premier Wever-Croes a bisa.