Ayera tardi, a traves di un comunicado di prensa, PR di AZV, Solange Tchong a duna un contesta publico na un pregunta di Sr. Robert Arends, indicando cu “gran mayoria di e dunadonan di cuido ta traha digitalisa.”

Mediante un e-mail cu a comparti tambe cu medionan di comunicacion, Sr. Arends a puntra:

“Por fabor splica publico pakico hulpverleners (dokternan di cas y specialistanan) no ta manda formularionan pa laboratorio/botica/etc. pa medio di “fax”, etc. (= circuito electronico ) en bes di duna e pashent pa hiba formulario pa laboratorio/botica. E sistema ta traha bon, pero ta e pashent mester pidi e hulpverlener, pasobra e hulpverlener” no ta hacie di mes (automaticamente). Dicon?
AZV no por duna instruccion na e zorgverlenernan pa usa e circuito electronico en bes di encarga e pashent pa hiba e formularionan? E ta facilita hopi e trabao di hulpverleners y e ta elimina e molester pa e pashent.”

Pa cu esaki, AZV a emiti un contesta a traves di un comunicado di prensa, bisando:

“E gran mayoria di e dunadonan di cuido ta traha digitalisa, por ehempel pa e mantencion di e filenan medico di pashent y pa intercambio di cierto informacion di pashent. Por ehempel tur dokter di cas ta traha cu e sistema digitalisa cu yama “Pro medico” y por ricibi resultado di test di laboratorio digitalmente. Esaki tabata un trayecto cu a logra pa motibo cu a ricibi e sosten di e.o. HAVA (e Asociacion di Dokternan di Cas di Aruba).

“Sinembargo, no tur dunado di cuido ta traha cu e mesun sistema digitalisa (automatisa). Por ehempel pa e specialistanan esaki ta un otro situacion. Esnan den servicio di Horacio Oduber Hospital ta traha cu 1 of 2 sistema digitalisa. Pero si wak e specialistanan cu ta traha independientemente (vrijgevestigd); nan ta traha cu diferente otro sistema. Anto ey tin un reto grandi. Organo Ehecutivo AZV ta stimula e uzo di sistemanan digitalisa pero ta consciente cu esaki no ta algo cu por keda cla den un solo rato. Manera ya menciona, tin diferente factor cu ta influencia con lihe por bay over na un solo sistema di traha totalmente digitalisa y bon conecta na otro.

“Esey ta e.o e paisahe diverso di diferente sistema na cada loket of organisacion, e compatibilidad y conexion di cierto sistema digitalisa, e resultado cu sector medico ta desea, e tempo y e finanzas. Di parti di AZV semper a stimula e dunadonan di cuido pa busca mehoracion den servicio y sigur e apoyo di sistemanan digitalisa pa facilita di un banda e trabounan di e dunadonan di cuido mes y di otro banda e servicio directo na e pashentnan / aseguradonan di AZV.

“Awor nos tin algun aña caba trahando riba e introduccion di un solo sistema of un solo conexion riba e sistemanan actual. Corectamente ta observa cu “nos no ta eynan ainda” pero e ta un meta si cu seguro AZV hunto cu sector medico tin. E instruccion pa tur dunado di cuido traha mas digitalisa y eficiente a sali. Pero hunto lo tin cu sigui traha riba esaki pa evita di causa molester na pashent/asegurado di AZV.”