Minister Dangui Oduber (MEP) a anuncia cu pa otro siman lo nombra un director nobo pa AZV.
E director actual Anko Ringeling a declara aña pasa despues di e reunion di consulta cerca gobernacion cu su decision di no sigui mas den e funcion aki. El a bisa cu su renuncia tabata un decision cu el a tuma prome cu eleccion. Esaki minister Oduber a bisa durante un conferencia di prensa.
“Un proceso transparente durante ultimo luna no manera otro gobierno ta haci di pone ex coordinadornan como director sin cu tin ningun procedura pa selecciona manera tur proceso mester cana. Nos a bisa nos kier trece varios cambio pa cual ta e maneho di AZV.
Nos kier revisa e ley, cual ta uno cu hopi anticua. Nos kier reduci e costo di AZV, un transformacion completo den AZV. E director cu nos a scoge sigur lo por haci e trabounan aki pa AZV. Asina por transforma e organisacion aki cu ta un di e pago nan mas importante den e sector di salud publico”, ae mandatario a splica.
Nos a haci un solicitacion habri pa asina e personanan adecua pa por solicita, nos a haci esaki durante tres luna. Supervision di AZV ta repasa bou di tur e candidatonan. Nan ta haci entrevista cu tur e posibel candidatonan cu den nan opinion ta cumpli cu tur rekisito segun e funcion ta describi.
Despues e hunta lo haci un lista mas cortico. Di e lista aki nan lo scoge un candidato cu den nan opinion lo ta e miho candidato pa e funcion di director. Nan lo trece esaki dilanti pa minister di Salubridad. Esaki ta e proceso cu ta den su fase final.
Pa otro siman nos lo anuncia y presenta e director aki den un conferencia di prensa E director actual lo mester entrega su retiro, e ta riba pension caba. Lo bay tin un periodo di transaccion cu e lo entrega tur su tareanan pa e director nobo. E mandatario a splica cu dia 15 di augustus lo ta ultimo dia di trabou di e director actual Anko Ringeling.
Bon Dia Aruba a acerca vocero di AZV Solange Tchong pa algun informacion tocante esaki ‘no ta conoci ainda ken ta e director nobo ni tampoco ki dia e ta cuminsa cu su tarea como director di AZV’, Esaki ta locual sra. Tchong a remarca.
Segun e mandatario a bisa cu pa dia 14 di juni lo lansa e aplicacion cu lo midi e servicio cu dokternan di cas ta duna nan pashentnan ‘e comunidad di Aruba ta haya e oportunidad pa duna un rating na e servicio cu dokternan ta duna nos comunidad’.
“Tin hopi presion di comunidad pa e servicio di dokter nan di cas y di eerste hulp na hospital. Nos a tuma e decision cu entrante 1 juli venidero lo bin cambio na dokter na warda cual lo muda pa edificio nobo pa hospital cu orario amplia. Nos ta bay baha presion di eerste hulp asina reduciendo e tempo di espera.
Nos kier mehora e cuido medico, AZV ta un instancia importante pa e maneho di salud publico. Nos kier un director dinamico cu mente habri. Nos convenci cu e director nobo lo bay haci su trabou bon pa mehora e servicio.
