Tabata tin varios discusion den comunidad por ehempel riba dicon AZV no ta cubri tratamentonan cu ta den research, pues den fase di haya sa ki efecto e terapianan aki tin. “Eseynan ta cosnan cu solamente nos por bisa cu nos lo sigui e desaroyonan y lo tin cu wak si den futuro lo cambia esakinan den ley di AZV si of no”, vocero di AZV Solange Tchong ta splica Bon Dia Aruba.

“Pa aworaki nos ta wak cu nos responsabilidad mas grandi ta cu e pakete di AZV y esey te cu aworaki ta defini manera cu e ta”, sra. Tchong ta bisa. AZV a haya e peticion pa en berdad tin otro departamentonan of organisacionnan cu kier tambe aplica pa e AZV Plus por ehempel. “Te aworaki AZV no ta den un situacion unda ta haci esaki na gran escala. Nos a wak por ehempel cu algun departamento di gobierno cu a bira independiente of nan forma huridico a cambia, ta cu nan a aplica cerca nos.

Por ehempel nos ta atende tambe cu ANSA, nos ta atende cu esunnan di Hof anto asina ey bo ta wak cu ta gruponan cu tambe a bin toch y puntra pa haya e administracion di AZV pa loke ta e parti ey”, sra. Tchong ta splica. Sra. Tchong ta enfatisa cu ta hopi importante pa nos no bruha e dos topiconan cu otro: AZV ta keda pa e 108 mil asegurado cu tin administra cual ta e base y ley di AZV, y e otro pakete cu ta e AZV Plus. E seguro ta bisa cu mester corda cu AZV Plus ta djis un nomber cu a duna pa por a administra e empleadonan publico cu tin e asegurado aki adicional.


Historia di AZV
Vocero di AZV Solange Tchong a remarca cu ta bon semper pa bay bek un rato den e historia di AZV pa por compronde algun cos. Na 2001 AZV a wordo introduci como un pakete basico, un seguro medico general pa henter e comunidad di Aruba. Eynan mester a cumpli cu e stipulacionnan di ley cu tabata: inscripcion na Censo, mester ta biba na Aruba y si ta a base di permiso pa esaki ta uno vigente tambe. E tempo aya a opta segun sra. Tchong pa un cierto pakete cual nos conoce como e AZV di awendia.

Es decir cu bo tin derecho ariba cuido medico di un dokter di cas, ora e dokter di cas referi bo pa un specialista, bo ta bay un specialista y haya esaki cubri via AZV. Tin e cuido di hospital, diferente testnan di sanger, urina etc. Pues diferente cuido medico cu ta den e pakete di AZV. Kico a sosode si cu na 2001 mes momento cu e seguro a wordo introduci, e tempo aya tambe gobierno di Aruba tabata tin un peticion na AZV. “E tabata mas bien un condicion cu tabata kier pa tuma over e administracion cu e tempo aya tabata yama Centrale Ziektekosten Administratie di gobierno. Anto nan tabata maneha locual nos tabata yama e seguro medico di gobierno di Aruba; un seguro cu abo tabata haya como trahado di gobierno di Aruba. Kiermen bo ta un empleado publico, of empleado publico cu a baha cu pensioen,” sra. Tchong ta splica.

Distincion entre paketenan
Gobierno di Aruba e tempo aya no solamente a pidi AZV pa administra e seguro basico general pa tur ciudadano, pero tambe pa e seguro medico adicional cu un empleado publico tin pasobra e ta den servicio di gobierno di Aruba.

Pues akinan bo ta haya e distincion entre e AZV basico y a bin tambe e ora ey e denominacion of terminologia di e AZV Plus cu tabata solamente un forma pa AZV den su administracion por identifica esunnan cu tin e seguro adicional aki. E seguro aki tin henter un otro base segun AZV, pasobra e ta deriva for di e relacion di dunado di trabao – den e caso aki gobierno di Aruba – cu su empleado. A base di esey AZV a bisa cu mester administra esaki tambe; e poblacion di Aruba cual ta 108 pa 110 mil asegurado, banda di esey pues e seguro di gobierno di Aruba pa administra den e sistema (AZV plus).

E AZV Plus ta un pakete di beneficio cu e dunado di trabao a duna, cual AZV no tin ningun influencia riba dje. Na 2001 ora cu AZV a cuminsa administra esaki, nan a simplemente tum’e over manera cu e tabata ta. Anto eynan tin algun diferencia si en berdad segun AZV cu como asegurado bo tin e pakete di AZV y esunnan cu ta den servicio di gobierno di Aruba (empleado publico/empleado publico riba pensioen) tin cierto otro beneficionan.

Pero atrobe a base di e relacion cu e tin hunto cu su dunado di trabao. “AZV no ta solamente administra e ley di AZV pero nos ta atende tambe cu e seguro medico adicional cu ta di gobierno di Aruba,” sra. Tchong ta bisa.