Riba rednan social a yega na nos atencion un persona cu tabata pidi ayudo un momento pa motibo cu su baby di seis luna no a haya seguro di AZV. Esaki segun e post, ta relaciona cu su yiu no a nace na Aruba anto e no tin un permiso. Nos a acerca AZV pa claridad riba esaki.
Un dama ta skirbi online cu el a bin for di St. Maarten anto su baby a nace na st. Maarten. E dama mes a nace na st. Maarten pero su mayornan y mayornan di su pareha a nace na Aruba. E dama cu su pareha ta inscribi caba anto nan si por haya AZV. E preocupacion di e dama a bini cu AZV a bis’e cu su yiu di seis luna no por haya seguro pasobra e mester permiso. “Ki coy macaco e cos ki ta?,” el a comenta.
E mama ta sigui expresa cu ta ora algo pasa so seguro lo worry y no ta compronde pakico no ta sigura e baby bao di e mama. E no ta compronde pakico lo mester warda riba e departamento Dimas pa algun luna pa su yiu haya permiso y despues por wordo sigura.
Segun vocero Solange Tchong, ley di AZV ta stipula cu pa inscribi na e seguro nacional, bo mester ta inscribi na Censo, biba na Aruba y tin un permiso di estadia valido verblijfsvergunning). Den e caso aki, no a cumpli na e dos rekisito aki esta inscribi na Censo y tin permiso pasobra e baby no ta inscribi na Censo y no tin un permiso. A base di Ley di Admision y Expulsion, e baby ta rekeri di permiso pa motibo cu e no ta cay bou e prome 2 articulo/stipulacion; esta e no ta un landskind y e no ta ‘van rechtswege’ admiti. Pues e baby aki ta rekeri un permiso cu Dimas ta otorga.
Na momento cu e mayornan aplica pa un permiso na Dimas pa e baby, nan lo por bin den remarca pa e maneho special di AZV, esta pa ‘vergunningsplichtige’ babynan, cual mayornan mester presenta e prueba di peticion pa permiso na Dimas, segun vocero Tchong ta splica nos. Y pendiente di esaki, nan lo sigura baby pa tempo defini (pendiente papelnan keda cla). Esaki ta mas bien un servicio cu AZV ta duna dentro di e sistema hudicial (e leynan), e ta splica. Sra. Tchong: “Tin comprension pa e mayornan y nan frustracion pero asina e leynan ta stipula y AZV mester mantene su mes na dje. Ta di menciona tambe cu cada pais tin nan propio leynan dus AZV Aruba no por bisa nada of husga kico si of no ta conta pa e mama of tata na St. Maarten.”
