ORANJESTAD – Recientemente AZV a tuma nota di e comunicadonan cu ta e medionan y ta duna su reaccion.
AZV hunto cu HOH ta traha un manpowerplanning pa sa cuanto specialista medico tin actual y cuanto ta bin adicional e añanan binidero. A base di e manpowerplanning aki, AZV ta pone un budget disponibel pa HOH y ImSan por contrata e specialistanan necesario. Enfin, AZV ta responsabel pa cumpra e cuido, HOH y ImSan ta esun responsabel pa suministra e cuido.
AZV ta e organisacion cu ta cumpra cuido medico pa su aseguradonan. Pa tipo di cuido cu no por tuma luga na Aruba, AZV ta cumpra e cuido adecua na Colombia, Corsou, Hulanda of Merca. Na Aruba mes tin solamente 2 instituto unda AZV por cumpra cuido medico y esey ta dr. Horacio Oduber Hospital (HOH) y Instituto Medico San Nicolas (ImSan).
Vacatura
Actualmente tin diferente vacatura na Aruba pa specialista medico. Tin luga pa:
Oncologo,ginecologo, pedriatra, KNO,intensivista.
Mester ta cla cu no tin niun drempel financiero pa e vacaturanan di e specialismonan aki riba menciona ta wordo yena. E budget t’ey, pero HOH no a contrata dokternan fiho ainda.
Reemplasante temporal
Logicamente e demanda pa cuido medico ta keda existi. Pa yuda e pashentnan tanten, HOH ta busca dokternan reemplasante cu ta bin Aruba pa un periodo cortico te ora un dokter fiho ta wordo contrata. Esaki no ta un situacion optimal pa e pashent, specialmente ora ta trata un malesa serio manera cancer. Sin embargo, manera anteriormente menciona, e ta necesario si pa e continuidad di cuido.
Monitor
For di november 2018 AZV ta vigila e situacion minucioso y ta reuni frecuentemente cu HOH como esun primeramente responsabel pa esaki.
