Vocero di seguro nacional AZV Solange Tchong ta splica cu tin un comision medico pa evalua decision ora cu un pashent mester tratamento urgente den exterior. Nan ta opta Colombia pa motibo cu e distancia (mas cerca).
Fuera di un comision medico pa e tipo di casonan aki, AZV tin conseheronan medico on call cu por wordo yama na cualkier momento pa tur caso di emergencia. “Si tin un emergencia unda mester hiba e persona cu Air Ambulance, e ora ey mayoria di biaha AZV lo opta pa Colombia.” Otro paisnan e ora nan no ta considera.
Transportacion mas lihe
Den mas o menos cuater pa maximo dies dos ora ya caba un Air Ambulance por yega for di Colombia pa Aruba. “Cual ta facilita nos specialistanan akinan pa por yuda un pashent mas lihe. Hopi biaha e evaluacion di cu ki transportacion e pashent ta bay, tin di haber cu e peticion mes cu ta drenta na AZV”, e vocero ta splica.
Hopi biaha segun sra. Tchong, ora cu haya un pashent cu a pasa den un accident hopi grave, ta rekeri un cuido special pa purba transporta e pashent dentro di 24 ora. “Ora un hende ta malo nos no ta para keto na tur e proceso tras di dje. Tin henter un proceso for di momento cu e peticion drenta te ora nos empleadonan tin cu prepara tur cos, documentacion, carta di garantia etc. pa e pashent por sali.” E proceso aki den e ultimo cinco pa shete aña nan a mehor’e hopi. Segun sra. Tchong aworaki pashentnan y nan acompañante ta keda sorprendi con lihe esaki ta bay.
Importancia riba paspoort valido
E vocero ta trece dilanti cu situacion asina ta mustra tambe e importancia pa tin un paspoort valido. “Nos tin cu corda cu bibando riba un isla manera Aruba ta rekeri cierto cosnan. Un di e cosnan importante tanto pa hendenan grandi y mayornan, cu mester percura pa semper tin paspoort na ordo y no solamente pa vakantie. Bo no sa nunca ki ora algo por pasa anto bo ta haya bo den un situacion caminda specialista ta bisa cu mester haci un peticion pa AZV pa sali mesora. E ora ey sikiera bo tin un cos menos pa haci”, sra. Tchong ta splica.
