ORANJESTAD – Compania di seguro medico nacional AZV a reacciona riba e comentario di e mayornan di e baby Lunah riba e decision di AZV pa no sigui cubri su tratamento.
Aki bou por lesa e relato di AZV:
Den edicion di Bon Dia Aruba di diabierna 30 di september ultimo a sali un articulo tocante baby Lunah unda e mayornan ta laga sa cu nan a haya un ‘no’ oficial di AZV. Banda di dicho articulo cu a sali den Bon Dia Aruba, AZV kier duna un declaracion tambe riba algun post cu a sali riba Facebook.
AZV a consulta cu specialistanan na Aruba, Colombia y Hulanda pa duna conseho. Niun di e specialistanan aki, ni esun cu ta willing pa haci e operacion na Merca, ta di opinion cu e operacion concerni ta comun den nan area di profesion. Es decir e no ta custumber pa haci e operacion den caso di un mucha manera Lunah. E ley di AZV ta stipula cu e asegurado tin derecho riba cuido cu ta comun den e area di profesion. E asegurado no tin derecho riba tratamento cu ta wordo considera experimental.
Evaluacion
AZV a comunica na e famia di Lunah cu AZV ta dispuesto pa manda Lunah cerca Fundacion Cardiovascular di Bucaramanga, Colombia pa e dokternan eynan den comunicacion cu e dokternan di mucha na Aruba por haci un evaluacion.
Interes di comunidad di Aruba
AZV ta compronde cu hopi hende ta interesa y emocionalmente envolucra cu e condicion di Lunah, pero tambe ta convenci cu e ta den bon man cerca e dokternan na Aruba, Colombia y Hulanda cu ta traha duro pa e bienestar di Lunah. Decisionnan riba tereno medico nunca ta facil pa tuma, mas aun ora ta referi casonan special. AZV ta consciente cu den cierto casonan e ta dificil pa acepta e decision.
