AZV: Ainda sistema di voucher ta den prueba

Minister di Salud Publico Alex Schwengle  den compania di director di AZV, Anco Ringeling a bin cu un conferencia di prensa pa splica e motibo y implementacion di e medida nobo di voucher  pa e aseguradonan manda pa tratamento na Colombia den compania di un acompañante of famia. Segun nan e sistema di voucher ainda ta den prueba.

Bon Dia Aruba a publica como esun prome fuente riba e sistema aki. E momento ey e vocero di AZV a bisa cu a cambia di sistema pa no duna e acompañante di e pashent ora di bay pa cuido den exterior, placa mas. En bes di esaki nan ta haya voucher. Asina AZV kier maneha e situacion tambe afo unda tabatin keho di centronan di cuido na Colombia unda e placa di e seguro ta wordo uza pa otro cos, hasta pa fiesta.

Pero awor e mandatario ta bisa cu e sistema di voucher ainda ta den prueba. E tambe ta splica cu no ta para den ley pa AZV ta zorg cu ora e pashent ta bay afo, lo mester paga e guia social. Locual Bon Dia Aruba ya e trece tambe den su noticia anterior.

E minister  Schwengle ta enfatisa un biaha mas cu e guia social ta inspira den e sistema social di solidaridad di AZV, ya cu e persona ta bay gewoon pa yuda e pashent y pa tal motibo AZV ta duna un aporte na e persona aki, locual e ta haya ‘masha bunita’  “Pero esaki no ta nifica cu nos tin cu paga tur cos”.

E ta un sistema cu ta funcionando pa añanan caba, caminda ta regla cu e guia social ta haya loke ta ekivalente na 20 dollar pa dia pa nan necesidad basico, entre nan cuminda. Pues e no algo duna pa cubri tur bo gastonan, e ta un compensacion mas bien pa alivia bo gastonan. Igualmente sr. Ringeling a enfatisa cu tur pashent manda afo pa AZV basicamente ta bay cu un acompañante “no ta un derecho di e pashent”.  El a bisa cu e ley no ta obliga AZV pa manda un acompañante cu e pashent. Esaki ta un maneho cu AZV a introduci considerando cu e por yuda e pashent pa tin un sosten mas  tanto moral durante e tratamento.

Voucher
Pero tanto sr. Schwengle como sr. Ringeling  a splica cu pa motibo di maneho administrativo, nan a bin cu e sistema di voucher inicialmente pa e pashentnan y su acompañante cu AZV ta manda pa Cali na Colombia y Merca. Ainda pa esunnan  manda pa Bucarramanga na Colombia nan ta bezig cu algun asunto logistico cu e clinica prome cu nan ta bin cu ne. Tambe nan a bisa cu lo bin evaluacion riba e calidad di servicio tanto di cuminda como di hotel.  Director di AZV a declara cu locual nan ta paga e hospital pa  e servicio ey,  ta hopi transparente. “Ya cu nos no ta mucho kens di paga mucho exagera pa e servicio ey.” Ademas e mayoria di comentario cu nan ta bin hayando ta positivo; pero esaki no ta kita cu si tin critica nan tin cu scucha nan seriamente.

Inspeccion
Regularmente nan ta bay pa inspecciona  e hospitalnan cu AZV ta traha cu ne, pa wak nan facilidadnan.  Tambe e facilidad logistico manera hotel, cuminda di e hotel y hospital tambe, etc. “Nos ta keda vigila e calidad”, segun e director di AZV. E mandatario Schwengle a sigura cu e introduccion di e sistema di voucher ta den prueba, pues nan no por sigura cu e  ta bay keda asina, ya cu nan ta kere cu nan lo por haci’e miho.

“Si e no ta traha miho nos ta bin cu algun otro e ora ey." E minister a declara cu si nan no ta haya un chens pa mehora e sistema, con “boso kier pa nos mehora e sistema aki”. Mientras cu sr. Ringeling a bisa cu mester evalua e introduccion di e voucher, ya cu recientemente nan a bin cu e sistema aki; y ainda ta mucho tempran pa bisa cu nan lo stop cu ne.

E mandatario ta haya cu eventualmente e informacion tocante e voucher eventualmente a sali di un forma no adecuado.  Pero e punto ta cu nos tin un sistema di seguro general pa henter pueblo, sin niun sorto di diferencia cu ta garantisa un bon cuido .  El a bisa cu e sistema aki no ta perfecto ya cu tin cosnan pa drecha, pero si nos ta compar’e cu nos region y cu Latino America, e ta garantisa cu nos no ta mucho leu di e miho sistema di Merca.

Di su banda director di AZV  tambe a bisa cu a tuma nota di cierto comentarionan haci den medionan di comunicacion y social media riba e cambio cu nan a haci di introduci e vouchernan.  El a splica cu e voucher ta traha manera un bono cu ta duna derecho riba un of mas cuminda y tambe e transportacion entre hotel y hospital.