AZV a presenta su relato anual di aña 2021 cu un disminucion di aseguradonan compara cu 2020

Organo Ehecutivo di AZV mediante un conferencia di prensa ayera mainta a trece dilanti cifranan di e relato financiero di aña 2021 pa duna un indicacion con e situacion di e fondo di seguro di gasto medico ta desaroyando.

Edwin Jacobs director di AZV a menciona cu siman pasa nan a entrega na minister di Salud Publico, Dangui Oduber, e relato anual di AZV cu tambe ta contene desaroyonan pa loke ta trata e cuido cu a wordo cumpra e aña pasa pa e organo ehecutivo di AZV di e seguro di gastonan medico.

Pa loke ta trata cantidad di asegurado, pa aña 2021 e cifra a disminui levemente cu 106.740 compara cu aña 2020 cu tabatin 107.079 asegurado, e porcentahe di asegurado riba 65 aña a subi na 16.9%.

“Nos ta sigui hopi di cerca e desaroyo di asegurado riba 60 aña pasobra esaki ta un impacto riba nos gastonan medico”, Jacobs a sigura.

E porcentahe aki ta crece y lo sigui crece manera el a expresa na unda cu den aña 2030 lo por yega di 25 pa 30% riba 65 aña y 35 pa 40% riba 60 aña.

Pa aña 2021, AZV a registra un bahada leve den e gastonan unda cu un parti tambe ta debi na e recortenan cu a wordo haci cu e plan ‘5 Wave Model’, e aña aki a cera cu 447.8 miyon florin di gastonan medico, pa aseguradonan na aña 2012 e gasto tabata di 3.463 florin y a bin aumentando te 4.195 florin promedio pa cada asegurado pa aña 2021.

“E tendencia aki ta bay sigui den futuro pasobra e gasto promedio di cuido pa asegurado ta bay keda aumenta den futuro, Jacobs a sigura.

Mirando e cifranan di entrada, 2019 tabata un bon aña cu a registra un entrada di 263.6 miyon florin na entrada di prima, door di Covid-19 na aña 2020 a baha na 222.6 miyon florin y 2021 por a mira un bon recuperacion cu 243.4 miyon florin.

Pa cu impuesto asigna BAZV, cu manera Jacobs a declara ta un componente hopi importante di entrada di AZV pa cubri su gastonan, nan ta wak un crecemento mucho mas fuerte den comparacion cu e prima, unda cu mester tene na cuenta cu e prima ta trahado cu na cierto momento a pesar cu turismo no tabata den su miho momento, a mantene e trahado den nan trabou pa loke e primanan a crece menos cu BAZV, ora turismo a cuminsa drenta na e pais turista tambe ta paga BAZV.

Pa cu esaki, na 2020 e cifra tabata di 144.6 miyon florin y pa 2021 a aumenta cu 40 miyon florin mas, casi 30% di aumento den entrada di BAZV cu ta keda un fuente hopi importante pa AZV unda Jacobs a sigura cu ainda nan ta kere cu nan por haya mas di esaki, ta p’esey cu siman pasa nan a cuminsa cu e campaña “A bo, a pidi bo recibo?”.

Di loke ta trata e contribucion di e pais, Jacobs a bisa cu esaki ta loke ta cera na final di dia e gastonan di AZV, na momento cu nan tin nan gastonan, nan ta kita e entradanan prima, BAZV y si ainda tin gastonan cu no a wordo cubri, esey ta wordo cubri cu un contribucion di pais, na 2019 gobierno no mester a duna e contribucion di gobierno pa e fondonan aki pero na 2020 nan a ricibi 99.7 miyon florin debi na sosten di likides ricibi di Hulanda, na aña 2021 el a reduci na 33.9 miyon florin.

E resultadonan di ‘5 Wave Model’ Jacobs a señala cu e gastonan a baha cu 1.2 miyon florin, pero esey no ta nifica cu no tabatin consumo, e acuerdo cu Aruba tin cu Hulanda di recorte 60 miyon florin den cuido medico nan ta tuma accion pa nan por a reduci gastonan, pa aña 2020 nan a reduci 35 miyon florin y pa 2021 nan a reduci 36.7 miyon florin sin logra e cifra di 60 miyon. Un gran parti di esaki ta debi na e reduccion di tarifanan y presupuesto manera Jacobs a informa.

Den e gastonan di administracion di AZV, nan a mira un reduccion di 18.63 miyon florin bayendo te na 16.9 miyon florin incluyendo e contribucion di personal den area di AZV den FASE di 12.6% cu ta wordo kita for di salarionan y beneficionan.

“Na AZV tambe nos tin nos maximo pa nos por mantene e gastonan di administracion di e fondo na un miho posibel”, el a enfatisa.

Di Zorgstromen unda Jacobs a bisa cu esaki ta e servicionan cu nan ta cumpra, den e parti di Opname en verplegin cu ta trata basicamente di hospital, compara cu 2020 nan ta mira cu hospital a ricibi un aumento den e contribucion pa e unico suma cu nan ta paga pa diferente servicionan cu hospital ta ofrece na e aseguradonan.

E desaroyonan mas importante pa cu e parti di Opname en verpleging ta: Capacidad di cuido intensivo limita, relaciona cu Covid-19 unda nan mester a manda diferente aseguradonan di AZV pa Colombia, aña pasa tambe tabatin limitacion di cuido electivo unda na cierto momento no a permiti operacionnan cu no tabata di urgencia, loke a crea diferente lista di espera pa diferente tipo cuido caminda nan ta den conversacion cu hospital pa wak con nan baha e lista di espera.

Di e unico suma aki cu AZV ta paga pa hospital pa haya diferente servicio tambe nan tin falta di mas transparencia unda cu nan ta na caminda pa haya mas informacion y un miho bista di kico nan tin cu haya pa e 179 miyon florin cu AZV a paga pa hospital e aña pasa.

Tocante cuido pa exterior, Jacobs a indica cu compara cu aña 2019 cu e gasto tabata di 57.6 miyon florin pa aña 2020 y 2021 tin dos desaroyo importante unda cu door di ceramento di frontera hopi asegurado a wordo manda pa Hulanda cu tin gastonan den cuido mas halto cu Colombia y a resulta un aumento den e gastonan.

Di otro banda, lo cual a reduci e gastonan di cuido na exterior ta cu na 2021 radioterapia a inicia na ImSan na Aruba.

Pa remedinan, Jacobs a splica cu e desaroyo di esaki ta constante unda cu por a mira cu Covid-19 no tabatin mucho efecto riba e esaki, pero si tabatin un desaroyo den dje cu tabata e cambionan den lista positivo cu a wordo posponi y aworaki nan ta den otro version di implementacion di esaki.

ImSan igualmente cu hospital, tambe ta ofrece diferente servicio unda cu AZV tambe ta paga un unico suma, e desaroyonan mas importante di esaki ta strabismus, nan a habri 22 cama short-stay, radioterapia y un lista di espera pa operacion di wowo cu tambe tin atencion di AZV, segun Jacobs a declara.

Pa loke ta trata dokternan di cas, el a expresa cu nan tabatin e introduccion di HOED cu ta trata di dokternan di cas concentra na hospital cu na e momentonan aki ta dispone di 5, tambe aña pasa nan a contrata e prome dokter di Arubig Colombia y cu nan ta keda cu e reto grandi pa yena vacaturanan pa dokter di cas.

Tabatin un reduccion di gastonan den relacion cu Covid-19 compara cu aña 2020 cu tabatin 25.1 miyon florin y na 2021 tabatin 18.3 miyon florin, den esaki hospital a haya 10 miyon florin, pashentnan cu Covid cu a bay afo pa ricibi tratamento tabata di un suma di 7.7 miyon florin y pa PCR testen nan tin un gasto negativo di 2.8 miyon florin, pa motibo cu Jacobs a splica cu nan tin un palabracion di con ta reparti e ganashi den e parti aki cu ta wordo inverti back den sector di cuido.

Pa finalisa, Jacobs tabata presente ayera mainta na Parlamento di Aruba pa splica e relato anual aki cu tambe a wordo poni na disposicion di comunidad riba e website www.azv.aw