Finalmente y despues di hopi comentario expresa den social media y otro medionan di comunicacion, AZV a dicidi di manda e baby Lunah pa Colombia.
E decision aki no tabata uno facil pa AZV mes, ya cu e situacion di e baby ta uno delicado. Tanto specialistanan local y di afo a yega di conseha pa no move e baby afo, sino cu e criatura lo por sigui un tratamento a base di remedi na Aruba mes. Pero e decision di e mayornan tabata otro kendenan a boga pa un operacion of tratamento di su yiu den exterior via un campaña di solidaridad den social media.
Despues cu siman pasa e mayornan a haci un solicitud pa nan yiu lo wordo opera afo, ayera AZV a tene un reunion cu nan pa informa cu e decision a cay. Ta asina cu AZV lo carga e gastonan di atencion medico di e baby na Colombia. Di e forma aki AZV ta honra e deseo di nan, pero nan ta manda e baby bou responsabilidad absoluto di e mesun mayornan.
Un fuente di AZV cu Bon Dia Aruba a consulta a declara cu ayera e mayornan di e baby a firma un declaracion, ya cu si algo ta bay fout, nan no por responsabilisa despues AZV ni e doctor cu a atende cu e baby. E baby lo wordo manda proximamente na e Clinica Valle de Lili na Cali.
Ya caba e file di e baby a wordo manda pa asina e specialistanan di e clinica menciona lo por evalua, y informa oficialmente na AZV si nan lo por opera e baby si of no. Si nan lo carga e responsabilidad di opera e baby, AZV lo haci tur preparacion pa transporte urgentemente cu air ambulance pa Cali.
Falta di placa no ta berdad
E fuente di AZV consulta pa Bon Dia Aruba a lamenta cierto comentario expresa, entre otro cu e baby no a wordo manda pa falta di placa, locual el a nenga rotundamente. AZV a consulta su specialistanan caminda nan a indica cu e operacion cu e mucha tin mester di dje no ta algo complica of dificil, pero e situacion di salud rond di e baby ta complica.
Tur hende di bon curason ta roga pa e baby aki lo por haya su salud. Sinembargo considerando e situacion di e baby cu ta presenta multiple complicacion, esaki ta haci cualkier operacion cu riesgo pe. Bon Dia Aruba no kier bay den detaye riba e complicacion di salud cu e criatura aki ta bringa cun’e cada dia di su bida.
Comunicado AZV
Ayera tardi AZV a manda un comunicado caminda nan ta expresa textualmente cu ta existi un preocupacion “bou di hopi ciudadano tocante baby Lunah, kende a nace mentalmente y fisicamente handicap (y cu complicacionnan adicional) como tambe e pregunta si e baby lo mester bay exterior pa ricibi tratamento medico”. Y nan ta afirma cu AZV ta sigura cu e caso di e baby aki ta hayando tur atencion.
Igualmente e comunicado ta confirma cu e mayornan a wordo informa di e intencion di AZV, durante un reunion ayera merdia. Na mes momento e mayornan a haya e oportunidad pa haci pregunta y a firma un declaracion cu ta splica e riesgonan cu e baby ta core na momento cu haci e biahe y of wordo opera. AZV a palabra cu unabes un confirmacion drenta di e clinica di Colombia, lo tuma contacto bek cu e mayornan. E intencion ta pa e baby haya su cuido medico den exterior. AZV a manda tur informacion di e baby pa Fundación Valle de Lili na Cali, Colombia.
Otro pida di e comunicado aki ta indica cu “e operacion mes no ta uno complica sin embargo den e situacion delicado cu e baby Lunah ta, e baby ta wordo exponi na riesgonan hopi halto. E miedo di e dokternan ta cu e baby lo no sobrevivi e operacion. E mayornan ta nenga rotundamente pa duna aprobacion pa e tratamento cu remedi y ta para riba cu nan yiu muhe mester wordo opera na Colombia”.
