Ayera mainta, Algemene Ziektekosten Verzekering (AZV) a ofrece un conferencia di prensa pa trece dilanti un resumen di loke aña 2020 tabata pa nan y loke aña 2021 ta bay trece pa e departamento y pa comunidad en general.

Solange Tchong, vocero di AZV, a splica cu desde aña pasa nan a lansa su aplicacion na unda cu aseguradonan a cuminsa haci uso di e servicio di AZV app, e cual ta un medio na un medio cu cual e hendenan por identifica nan mes como cliente di AZV.

Tchong a comenta cu e medida di shelter in place a pone nan acelera nan trabou y door di esey AZV mester a bay lihe pa traha di otro forma. Loke a haci cu nan mester a cambia tur nan servicio na unda nan ta atende cliente personal na nan oficina, como tambe bay riba servicio digital, manera e-mail pa clientenan.

Di e manera aki, nan a zorg pa nan website nobo por facilita pa e clientenan por haya tur formulario, inscripcion y informacion pa cambio y tambe por haci diferente pregunta, pa motibo cu nan a introduci e chat live, cu tambe ta pa clientenan cu tin mester di algun informacion.

Aworaki AZV tin casi 29.000 cliente caba haciendo uso di nan aplicacion. Tchong tambe a menciona cu nan a amplia e funcionalidad riba esaki tambe, por ehemplo, cu por cambia di botica of dentista directamente.

Otro trayecto cu nan a encamina, segun Tchong a declara, ta cambionan riba e area informacion, comunicacion y tecnologia, caminda a cambia e sistema di e departamentonan aki y nan a actualisa e web portal cu ta usa pa dunadonan di cuido por wak data of informacion di e asegurado di AZV.

Di web portal aki di dunadonan di cuido, Tchong a expresa cu nan a ampli’e y actualisa pa percura cu tur servicio por bay riba e web portal aki. “Antes nos tabata usa entregamento di factura via papel y aworaki tur dunado di cuido ta haci uso di web portal”, Tchong a sigura.

El a trece dilanti cu ora Covid-19 a yega na Aruba esey a pone un presion grandi riba e fondo di AZV pero mas ainda riba con nan ta organisa e cuido medico na Aruba y esey a causa cu e departamento a haya instruccion di gobierno di Hulanda y di Aruba pa bay traha riba formanan con pa baha e gastonan di cuido medico.

Esaki a resulta tambe de loke nan ta yama e “Five Wave Model” na unda ta introduci diferente instrumento of medidanan pa tuma pa asina nan por cumpli cu a cortamento di 5 miyon florin pa luna den aña 2020.

Tchong a informa cu e total di esaki tabata 25 miyon florin pa aña 2020, di lo cual el a sigura cu nan a cumpli y a ofrece e plan aki cu lo keda aworaki pa Gobierno di Aruba pa bay evalua y avisa AZV e ora ey kico tur otro lo wordo introduci pa loke ta e Five Wave Model.

Pa salvaguardia e fondo di AZV y cuido medico na Aruba, el a splica e ideanan cu tabatin riba introduccion di un aporte propio of un risico propio.

Tambe el a papia di otro medidanan cu nan ta bay introduci pa loke ta trata e cambio di cobertura di remedinan cu ta bay ta vigente for di 1 di februari 2021 y a wordo adapta caba den e ley, un medida cu tambe ta sali for di Five Wave Model segun Tchong a expresa.

“Mester keda pendiente di comunicado di prensa di AZV pa remedinan pasobra un gran parti di nan ta categorisa como remedinan di cuido propio, cu por haya nan sin receta y hende mester evalua esey hopi bon”, Tchong a declara.

Esey a tuma luga hunto cu un comision cu ta traha pa minister di Salud Publico y tambe na AZV riba e parti di remedinan cu nan tin riba e lista positivo di remedi di Aruba.

Cu e pandemia di coronavirus, Tchong a expresa cu nan a haya confronta cu e situacion na unda mester adapta y dirigi full e atencion na e coronavirus, pa motibo cu esaki a causa hopi caso “y a bira un situacion na dado momento hasta alarmante cu a haci cu nos mester a para tur loke ta yama cuido electivo”, esaki ta referi na cuido di pashent cu por warda y por controla di un otro forma pa asina duna prioridad na esunnan cu a bira malo.

“Esey a rekeri un cambio grandi den tur sector medico” Tchong a afirma, na unda el a splica cu nan a adapta tanto pa loke ta reglanan di higiena pero tambe e pasonan cu mester a tuma luga.

Loke nan ta wak den pronosticonan y calculacionnan cu a wordo haci di diferente instancia cu ta envolvi den sector di turismo y economico, Tchong a menciona cu nan ta wak cu si e panorama por bira miho, AZV tambe lo bay lora miho, “nos tin cu corda cu nos a perde un gran parti di e primanan cu tin cu drenta pa via cu hopi hende a perde nan trabou”, den caso aki el a sigura cu no por cobra ni e parti di e trahado ni e parti di dunado di trabou.

Pa 2021, tambe lo tin un cambionan pa loke ta trata algun dokternan di cas cu ta bay stop, esaki ta motibo cu nan a yega na edad di pension y den caso aki nan lo wordo reemplasa cu otro dokter.