Un arzobispo Argentino, cercano na Papa Francisco, a bisa diasabra cu lo bolbe boluntariamente na Argentina pa responde na fiscal su acusacion di abuso sexual.
Javier Belda Iniseta, e abogado di ley canonico pa arzobispo Gustavo Zanchetta, a duna un declaracion bisando cu e monsignor lo yega Argentina mañan y lo coopera completamente cu autoridad.
Zanchetta ta acusa formalmente di ‘abuso sexual agrava continuo’ di dos seminarista, cargonan cu por duna un castigo maximo di 10 aña den prizon. El a rechasa e acusacion.
E caso di Zanchetta ta particularmente grave pa Francisco, mirando cu e papa tabata na altura di acusacion di conducta sexual inapropia di su ex- protégé na 2015, dos aña prome cu Zanchetta a renuncia como obispo di Oran.
Francisco a permiti su retiro na 2017 pa ‘motibo di salud’, pero despues a nombr’e na un posicion administrativo senior den Vaticano algun luna despues.
Den un entrevista di television e aña aki, Francisco a reconoce cu el a puntra Zanchetta tocante e acusacion inicial, relaciona cu potret sunu riba celular di e obispo. E papa a bisa cu el a duna Zanchetta e beneficio di duda despues cu el a bisa cu a hack su telefon.
Belda Iniseta a insisti cu huesnan a rechasa peticion di fiscal Argentino, Maria Soledad Filtrin, pa un orden di aresto internacional.
Tambe el a insisti cu e obispo ta kere cu actonan di fiscal tabatin intencion unicamente pa haya sa e berdad, ‘maske nan por parce compulsivo of repetitivo sin motibo aparente’.
Vaticano ta insisti cu e acusacion inicial di abuso sexual a ser entrega contra Zanchetta na fin di 2018. Pero AP y e corant Tribune of Salta a reporta cu documentonan y testimonio di oficialnan di diocesis ta duna acusacion creibel di conducta sexual inapropia hopi prome cu esey.
Zanchetta tambe ta enfrentando un huicio canonico. E acusacion no ta involucra menornan di edad.
Fiscal Argentino a bisa siman pasa cu a pidi un orden di captura pa Zanchetta pasobra e obispo no a contesta yamada y email pa ricibi notificacion di e proceso legal den su contra.
E declaracion di abogado diasabra a bisa cu e obispo ta na e ‘residencia indica na autoridadnan hudicial’. Aparentemente esey ta confirma cu Zanchetta ta kedando na e mesun hotel na Vaticano, Santa Marta, unda e papa ta keda.
