Mas sosten social, pordon di debe, ayudo pa sector cultural y proteccion di esnan cu ta busca asilo. Eseynan ta temanan di mocionnan cu a entrega durante e tratamento di presupuesto pa Asuntonan Interior y Asuntonan di Reino na Hulanda.

Sylvana Simons di partido BIJ1 a entrega un mocion unda ta pidi Gobierno di Hulanda pa considera pa kita e obligacion di Corsou, St. Maarten y Aruba pa paga e sosten di likides ricibi. Den su mocion, e miembro di Tweede Kamer a bisa cu e paisnan automo den Reino, cu ta Corsou, St. Maarten y Aruba a keda desproporcionalmente mas duro afecta pa e pandemia di COVID-19 compara cu Hulanda, y cu nan a ricibi prestamo den forma di sosten di likides pa absorba e slanan fatal na nivel economico y social pa motibo di e crisis.

Den concepto di e Parlamentario, e sosten di likides tabata necesario pa e ciudadanonan di e tres paisnan por a sobrevivi e crisis, di forma cu no ta pusha e populacionnan den pobresa, percurando pa nan keda cu acceso pa e necesidadnan di bida basico. Ademas, Simons a bisa den su mocion cu ainda economianan di e tres paisnan no a recupera di e crisis di corona, ademas cu hasta prome cu e pandemia ya caba tabatin hopi pobresa y cu e obligacion pa bolbe paga e prestamo lo saca placa di e tres paisnan cu ta necesario pa absorba e efectonan economico di e pandemia pa e proximo añanan. Sylvana Simons a pidi Gobierno Hulandes pa mira den ki forma lo por dispensa e tres paisnan di e obligacion pa paga e debe na Hulanda.

Simons hunto cu Marieke Koekkoek di Volt Nederland tambe a entre otro mocion riba sosten pa alivia e pobresa na gran escala riba e tres islanan. Nan ta bisa den nan mocion cu un cuarto di e populacion di e tres islanan mester a ricibi sosten di cuminda durante e crisis di corona, y cu desde 1 di October ya Hulanda no ta paga mas pa esaki y el a bira un responsabilidad di e paisnan mes pa sigui cu e sosten di cuminda necesario aki, y e pregunta ta keda si e paisnan por continua cu e ayudo di cuminda aki na 2022. Ainda e gruponan mas vulnerable riba e islanan no tin acceso structural na e necesidadnan basico di bida. Como tal e Parlamentarionan Hulandes ta puntra Gobierno di Hulanda pa mirando e situacion di necesidad di personanan den pobresa, si por sigui cubri e sosten humanitario, manera ayudo di cuminda, cuido medico y espacio adecuado pa biba, sikiera te cu 2022, y asina garantisa e necesidadnan basico di tur hende, incluso personanan indocumenta.

Di su banda, miembro di Tweede Kamer Jorien Wuitte di D66, hunto cu Don Ceder di Crhisten Unie, Laura Bromet di Groenlinks y Sylvana Simons di BIJ1 pone atencion na e asina yama empresarionan cultural riba e tres islanan cu ta esnan mas afecta pa motibo di caida di turismo y sigur tambe e medidanan di mitigacion contra e pandemia. Segun Wuitte, e grupo aki mester di sosten tecnico y opcion di financiamento. Ademas, e sector cultural por brinda un contribucion importante den diversificacion di economia di e islanan, mientras cu e sectornan aki, di tur cuater pais den Reino lo por sostene y enrikese otro. Como tal, Wuitte a pidi Gobierno di Hulanda pa busca bou cua condicion, e servicio di Cultura y Empresaria (Cultuur + Ondernemen) cu recien a bira disponible pa islanan BES, tambe por ta accesibel pa Corsou, St. Maarten y Aruba.

E di cuater mocion, di miembronan Bromet y Koekkoek a referi na e rapport recien di Amnesty Internacional riba e situacion di buscadonan di asilo na Corsou. Manera ta conoci, Amnesty Internacional a constata cu Corsou ta strobe acceso na e procedura di asilo, cu ta pone cu esnan cu ta busca ayudo ta keda deteni sin ningun proceso. Ademas, cu a base structural a constata maltrato y abuso di e personanan aki. Mirando cu Hulanda ta yuda Corsou y Aruba financia e cuido di frontera y como tal, ta contribui na un sistema cu ta trapa structuralmente derechonan humano. Pa tal motibo, e Parlamentarionan ta pidi Gobierno di Hulanda pa condiciona e cuido di frontera na paro di cualkier trapamento di derecho humano, y ofrece acceso na un procedura di asilo cu ta den liña cu e Tratado di Nacionnan Uni pa Refugiado.